ZALEN December 2, 2025: Mizo Academy of Letters (MAL) chuan Mizo tawng tihhmasawnna leh humhalh zelna atan an pawl hming chu 'Mizo Thu leh Hla Inpui' tiin an vuah thar a, an pawl hming bulah hian bracket-in (Mizo Academy of Letters) tih erawh a la awm zel thung ang.

Kum 1964 a din MAL hian November ni 29, 2025 (Inrinni) khan Mizoram legislative Assembly Annexe Building-ah an pawl 'Kum Tawp Inkhawmpui' an hmang a. An pawl President Prof. RL Thanmawia kaihhruaina hnuaia chawhnu rorel inkhawmah an pawl hming thar tur hi an pawm a. Hemi rual hian an pawl kaihhnawih atana hman turin Mizo tawng thumal thahnem tak an chher thar te chu, kum thara hman tan nghal turin an pawm bawk.

MAL kaihhnawih thumal thar an pawm zingah pawl hruaitu 'Office Bearer' te chu 'Puipate' tih a ni ang a, President chu Khaipa, Vice President chu Khaipa chhang, General Secretary chu Ziaktu lian, Asst. General Secretary chu Ziaktu chhang, Joint secretary chu ziaktu te, Finance secretary chu sum ziaktu, Treasurer chu sum vawngtu tih te a ni dawn a.

Thumal an pawm thar 72 zet zingah hian Receptionist chu khualchhawn, Usher chu Viltu, Paper presenter chu Thupui sawitu, programme chu hunruat, resource person chu Rawnpu, Convener chu Huihaitu, Coordinator chu Huikhawmtu, Auditor chu Sum endiktu, Office Assistant chu Pisa nghak, Seminar chu Zir chianna, Symposium chu Sawiho pui, Workshop chu Thawhchilh, Discussion chu sawi hona, Consultation chu inrawnkhawmna ti te in an vuah bawk.

MAL president Prof. RL Thanmawia chuan, 'Tuna an thu chher hote hi MAL huangchhunga hman tura tih a ni a, Tawng lama thuneitu ber chu Mizo Language Development Board a ni thung. Chuvangin MLDB-in hetiang zawk hian a tih chuan kan la siam danglam thei ang a, tuna mi hi chu keimahni hman tura kan duan a ni a. Remchanga midangin an lo hman ve theih phei chuan a lawmawm hleah kan ngai" a ti. 

MAL hian General headquaraters pakhat, Aizawlah an nei a, Joint Headquarters pali - Lunglei, Siaha, Champhai leh Saitual te an nei tawh a. General Heaquarters hnuaiah hian Ramhlun branch pakhat a awm bawk. Heng bakah hian Manipur, Tripura, Myanmar leh Mizoram district danga literature society te nen pawh an inthlunzawm tha hle a. MAL General Heaquarters hnuaiah hian member 400 chuang an awm mek a ni.