Aizawl : Zirtawp zan khan Chawngtea CADC Art & Culture Hall-ah Chakma Autonomous District Council (CADC) hotute, official-te, khawtlang hruaitute leh tlawmngai pawlte pualin sikserh (malaria) chungchang leh a dona kawnga beihpui thlak dan tur zir hona buatsaih a ni a. Health Minister Dr R. Lalthangliana chuan a hmanpui.

Health Minister Dr R. Lalthangliana chuan District Council sawrkar thar chu hun kal tawh aia thaa sawrkar kalpui turin duhsakna a hlan a. Malaria chu hriselna lama Mizoram dinhmun hnuk hniamtu a nih avangin nasa takin malaria dona kawngah tan lak a ngai tih a sawi a. Malaria vanga sum tam tak sen ralna leh thihna hial thleng thin tibo turin mipui tanrual a pawimawh thu a sawi. "Mi tinin mahni theihna zawn theuhvah theih tawp chhuahin malaria hi do a tul," a ti. 

Tanrualna nen Mizoram atangin malaria chu um bo thuai theih a nih a beisei thu sawiin, "Sawrkar laipui leh state sawrkar hma lakna thlawp a, malaria um bo tura thawhho puiah CADC sawrkar leh CADC huam chhunga tlawmngai pawl leh mipuite ka sawm nghal a ni," a ti.

CADC Chairman Kali Kumar Tongchangya chuan inlawmna thu sawiin, State PH Consultant (VBD) Malsawmthangi Pachuau chuan powerpoint presentation hmangin malaria chungchanga Mizoram dinhmun a tar lang a. Population atanga tehin Mizoram chu India rama malaria vei tamna ber state a nih thu leh Lunglei, Lawngtlai leh Mamit District-ahte malaria hi a hluar zual tih sawiin, Mizorama malaria do beihpui thlak tura ruahmanna leh hmachhawp hrang hrangte a sawifiah bawk.