Aizawl; Kumin January atanga September thla tawp thleng khan Mizoramah malaria vanga thi mi pariat an awm tawh a. Malaria vanga thihna thlen chhan ber chu in-test tlai vang leh inenkawl tlai vang niin health department thawktute chuan an sawi.

ZALEN-in health department thawktute hnen atanga thu a dawn danin kumin chhung hian malaria vei mi 8,447 hmuhchhuah an ni tawh a. Lawngtlai, Lunglei leh Mamit district-te chu malaria vei tamna niin Lawngtlai district-ah malaria vei hmuhchhuah an tam ber a ni.

Kumin chhung hian Lawngtlaiah malaria vei hmuhchhuah mi 3,977 an awm tawh a, hei hi kumin chhunga malaria vei hmuhchhuah atanga chhutin a chanve deuh thaw 47% a tling a ni. Lawngtlai dawtah hian Lunglei district ah hmuhchhuah an tam ber a, mi 2,422 hmuh an niin Mamit district chu pathumna niin kumin chhungin malaria vei mi 1,261 hmuh an ni tawh.

Kumin chhunga malaria vanga thite hi Aizawl West, Lunglei leh Champhai district-ah pahnih theuh awmin Lawngtlai leh Serchhip district-ah pakhat ve ve an awm a ni.

Health department thawktute chuan Mizoramah malaria a hluar chho zel tih an sawi a, a bik takin khawtlang lamah vei hmuhchhuah an tam zual niin an sawi.

Khawthlang lama malaria vei an tam chhan chu khaw lum vang nia sawiin Dr. Hmingthanmawii, Joint Director, Malaria chuan, “Khawthlang lamah hian khua a lum a. Hnathawhnaah te kawr ha mang loten an awm bakah zing leh tlaiah thawmhnaw inbel loten an awm tam a, hei vang hian hri kai an tam phah a ni,” a ti.

Dr. Hmingthanmawii chuan malaria lakah fimkhur a ngai hle tih sawi bawkin, "Kan khua a sik chuan thisen test vat a pawimawh a. Tunhnaia thi ho pawh hi an in test tlai vang leh inenkawlna an dawn tlai vang a ni a. Hri an kai tih hmuhchhuah anih chuan an lo na (serious) hman tawh a, enkawl a buaithlak tawh thin a ni," a ti bawk. Chakma leh Tuikuk ten malaria an vei tlem nia sawi chungchangah, "Heng hnam pahnihte hian puitling bikah chuan natna do theihna (immunity) an nei tha a, mahse naupang bikah chuan he natna thihpui hi an awm ve tho a ni," tiin Malaria lama mawhphurtu Dr. Hmingthanmawii chuan an sawi bawk.

Dengue chungchang zawhna chhangin Dr Hmingthanmawii chuan November atang chuan hri vei an tlakhniam an beisei tih sawiin dengue erawh a awm reng dawn niin a sawi a. "Dengue hi a awm reng tawh dawn a, chuvangin mitinte hri kai lo tura kan fimkhur a pawimawh a. Kan in leh a vel thosi tui theihna tur tui tling kan tihbo a, kawr leh kekawr tluan kan inbel a pawimawh bakah thosi hlauh chi kan siam thiam a pawimawh a ni," a ti. Health department in dengue vanga thi mi 2 chiah an la chhinchhiah chungchang sawiin, "Dengue vanga thi hi mi 2 aia tam pawh an ni mai thei a, mahse keini chuan elisa test hmanga an vei ngei a ni tih kan finfiah chauh hi kan pawm theih anih avangin thi zat hi an tlem a ni," a ti bawk.

Kum 2026-22, September thlenga malaria dinhmun
Kum     vei     thi
2016    7583    9
2017    5715    4
2018    4296    3
2019    8543    8
2020    8349    6
2021    5637    10
2022    8447    8