Aizawl: Congress Legislature Party Leader Zodintluanga MLA chuan Covid 19 hripui vangin tam tlak a hlauhawm tih sawiin mipuite nasa lehzuala inpuahchah turin a chah.

Zodintluanga hian a bial Thorang tlawhin mipuite hnenah, "India ramin a thar sa hi tunah hian kan la ring a ni mai a, he hripui avanga kan tawrhna hi a la tawp mai dawn lo. Nakkum lam khi kan thlir a ngaia tunah hian lo lamah nasa takin hna thawkin kan fehchhuah a ngai a, kumina lo vat lote pawhin kang hreng ila lo atan siam ila. Tunah hian chul rihna atan pawh a la tlai lutuk lo a, chulte pawh a thei theiin i rit ang u, buh leh thlai kan thar tam a ngaia hemi atan hian a la tlai lo a ni," a ti.

MLA hian Thorang bial khaw thenkhat Mauzam, Terabonia, Marpara South leh New Sachan te chu International boder Bangladesh ramri mai an nih avangin tun hripui leng mekah hian venhimna nasa zawk neih a ngaih thu a sawi a. "Bangladesh lamah Covid 19 case a hluar chho mek a, Bangladesh leh Mizoram ramri hi nasa zawka kan ngaihven a ngaia ngaihthah chi rual a ni ta lo. Hemi atan hian puihna nasa zawk pawh an mamawh dawn a, BSF mi 42 vel chu awm mahse tualchhung mite hi kan thuamchak a ngai a ni. Mizoram lama rawn tlanchhiat hi an tum nasa dawn tih a lang," a ti. Hemi chungchang hi naktuk hian Lunglei DC sawipui a tum bawk.