Aizawl: Health Minister Dr. R. Lalthangliana chuan nimin khan District Hospital Mamit-a khum 100 awmna tur building cheng vaibelchhe 17.93 senga sak tur lung a phum. District Hospital Mamit tana khum 100 awm tura ruahmanah hian Power Finance Corporation Ltd. CSR atangin 17.93 Crore, PFC atangin 70% (12.55) Crore ruahman a ni a. A bak senso zawng chu State Government-in a tum ve thung dawn a ni.

Dr. R.Lalthangliana chuan, "Health Deparment officials te a lian ber atanga a te ber thlenga kan thawhho that avangin Health Department chuan hmasawnna duhawm tak kan hmu thei zel a ni," tiin "Power Finance Corporation Ltd CSR fund hmanga khum 100 awmna tur Mamit District Hospital Building sakna tur kan nei theih chhan pawh hi kan Health Secretary hmalakna vang a ni," a ti. Mamit Hospital-in a mawmawh em em hnimhlum doctor pawh dah a nih dawn thu a sawi a, Mamit District Hospital-a Doctor indaihlohna phuhruk turin Mamit mi, MBBS zirchhuak lo zawng turin a ti bawk. Thangtea chuan hun reilote chhung Aspirational District term la awm chu hmang tangkaiin India ram pumah a titha pahnihna an nih chu chhawm nunga a aia tha zawk pakhatna ni thei ngei tura theihtawp chhuaha tan la turin thuneitute a ngen bawk a ni.

Khuallian bakah hian Mamit bialtu MLA Er. H. Lalzirliana pawhin thu a sawi bawk. Mamit District Hospital khum 100 awm theihna sak turah hian Main Building atan Rs 16.93 crore hman a ni dawn a, 1 crore hi hmanraw lei nana hman a ni ang. Building sak hna hi Zamzo Engineering, Construction & Consultacy te an ni dawn a, thla 24 chhunga sak zawh hman tura ruahman a ni.