Aizawl: Zirtawpnia Thinghlun khua-a John Zolawma thlam hal chungchang leh Ben David-a huhva huan Assam lam miten an tihchhiatsak chungchanga thil thleng leh boruak zirchiang turin Mamit DC Dr.Lalrozama leh SP Shashank Jaiswal te chuan nimin khan Thinghlun khua an tlawh.

Mamit District Bawrhsap chuan ramri buai chu State sawrkar pahnihin dawhkan kila sawiho-a chinfel theih anih laia hetianga Karimganj Administration hotute'n anmahni ngaihdan chauh ngaihtuaha Mizoram leh Assam inrina Thinghlun khua-a thlam halsak leh kuhva huan tihchhiatsak an ni chu pawi a tih thu leh a tawrhpui thu a sawi a. Dan lo anga Mizoram chhunga thil thleng chungchangah hian a tul anga hma la turin Karimganj Deputy Commissioner hnenah Zirtawp tlai khan ziaka thlen nghal a nih thu a sawi bawk. Mamit SP Shashank Jaiswal pawhin Thinghlun leh a chhehvel mipuite thlamuang taka awm tura chahin, a tul dan anga chak taka hmalak a nih dawn thu a sawi a. Mahni thu-a dan lo kengkawh ve ngawt lo tura mipuite chahin eng thil pawh thleng se, Police leh IR Duty-te hnenah report pe zel thin turin a chah a ni.

Assam Forest hotute'n Mizoram chhunga signboard an tar chu lakthlak a niin Kanhmun Police Station-ah lak a ni a. Kanhmun OC hnenah FIR thehluh nghal niin thlam an halna bulah hian 4th IR Platoon khat-te duty-na tur hnatlangin puan In sak nghal a ni.