Mizoram Agriculture Marketing Solution (MAMSol) chuan kum 2017 atang khan Mizoram hmun hrang hranga sawhthing chingtute thar chhuah an leisak thin a, 2017 atanga kumin thlengin quintal 21,160 an leisak tawh.

MAMSol Managing Director, Zorema Darkim chuan Mizoram hmun hrang hrangah Sawhthing ching an tam telh telh tih ZALEN hrilhin, MAMSol-in sawhthing an leite chu Asssam, Kolkota leh Tripura atangte an rawn leichhawn thin thu a sawi.

“Mizoram sawhthingte hi a tha hle a, India ramah Sikkim, Meghalaya te nen sawhthing nei tha ber kan ni,” Zorema Darkim chuan tiin, Aizawl, Champhai leh Serchhip district te chu Mizoram district hrang hrang zinga sawhthing thar chhuak hnem an nih thu leh Chawngtlai, Khanpui leh Rangvamualah te Packing House cum Collection Centre bakah Bairabi-ah Processing unit din an tum mek thu a sawi.

MAMSol-in sawhthing an lei hmasak ber kum 2017-ah kg.-ah Rs. 30-in kg 1,50,000 an lei a, kum 2018-ah kg.-ah Rs. 45-in kg 12,12,000 leiin, kum 2019-ah kg.-ah Rs 65-in kg 1,93,000 an lei. Kumin 2020 chhungin kg.-ah Rs. 65-in kg 5,61,000 an lei tawh a, Covid-19 hri leng vanga lockdown neih a nih, kumin April atanga June thla chhung khan Mizoram khaw hrang hrang 14 atangin kg. 4,60,485 an lei.

Kum 2017 atanga kumin thlenga MAMSol-in sawhthing an lei tawh zawng zawng hi kg. 21,16,000 (qntls. 21,160) a tling tawh. MAMSOL hian sawhthing an leina man chu pawisa faiin an pe nghal zel a, kumin bika sawhthing an leisak tam zual khuate chu - Chawngtlai (kg. 2,14,074), Sialhawk (kg. 61,000) Farkawn (kg. 28,000) Vaphai (kg. 20,000) te an ni.

MAMSol managing director-in ZALEN a hrilh danin December emaw January thla tir vel atangin sawhthing an lei leh tan dawn a, sawhthing an leite chu a fai tha tawk lo thin tih a sawi a, hemi chungchang inzirtirna hi khaw hrang hrangah an nei thin tih a sawi.