“An boxing khel an inhnehtawk lo lutuk a, pakhatin tlanchhe chungin, ‘Bûk tha leh rawh u!’ a ti chung mai,” tia fiamthua an sawi thin ang maiin, Inrinni zanlaia Uefa Champions League final khel tur, Manchester City leh Inter Milan hi kawng hrang hranga tehin Italian club tan chuan ‘Bûk tha leh rawh u!’ tih chungna tham a ni.

Ataturk Stadium, Istanbul-a inkhelah hian football hria inti chin chuan City hi chak ngei turin an dah vek a, an player neih that piah lamah an kaihhnawih thil hrim hrim thlirin rin loh zawk hi har tak a ni.

City squad-a mite hi lei dawn ta ila, neih nun ve deuh chu a ngaih hmel a, a tlawm thei anga chhut pawhin Euro maktaduai 1,260 zet man an ni a. Inter squad hlut zawng let aiin a tam a, anni chu Euro maktaduai 600 bawr chauh an ni.

Sum kaihhnawih bik chauh en pawhin Inter tan hi chuan ‘Bûk tha leh rawh u!’ tihna tham a ni nghal a. Football Benchmark-in a khaikhinnaah season khat chhunga City sum thawh chhuah hi Euro maktaduai 730.8 zet a nih laiin Inter erawh Euro maktaduai 321.8 chauh a ni a, a zahve pawh an phak lo.

An sum lak luh zinga Euro maktaduai 64.3 chu a hmuna an inkhel entute atanga an hmuh a ni a, an inkhel tihchhuahna man atang phei chuan Euro maktaduai 284 zet an la lut.

Italian club hi en ve ta ila, an khel entute atangin Euro maktaduai 44.3 an hmu a, an tihchhuahna atangin Euro maktduai 149 an la lut ve bawk a. English club chu thlau tak an ni.

City hian an bungrua (kit) petu (supplier), Puma nena kum 10 chhung inremna an neih atang ringawt pawhin Euro maktaduai 76 zet an hui luh theih laiin Nike-in kum 10 chhung atana thova Milan club an thawhpuina chu Euro maktaduai 20 chauh a ni thung.

Hei mai a la ni lo, an jersey-a thil inziak (sponsor) lian ber, Etihad Airways atang Manchester club-in Euro maktaduai 79 an hai luh theih laiin Inter hi chuan an kawr hmaa tar tur an nei lo.

Heng thil aia holam zawka lang, social media-ah mai mai pawh club pahnih huhang hi a innat hleih hle a. English club hian zuitu (follower) maktaduai 143 zet a neih laiin Italian giants chuan maktaduai 60 emaw chauh a nei pha.

An player zingah Kevin de Bruyne chu mi mala follower ngah ber niin maktaduai 49.3 chuang a nei a. Inter lamah chuan Belgian striker palian Romelo Lukaku niin maktaduai 20 chuang a nei ve bawk.

Kawng hrang hranga chhutin Inter hian City hi an khan lo va; mahse, football chu sum leh a kaihhnawiha chin fel chi a ni lo, khelmual chhungah a ni.

Pawn lamah chuan Italian club hi bet zawk mah se an Istanbul-a inkhel phak tura an kalkawngah Bayern Munich leh Barcelona te nena group khata awm hovin an tlang thei a, an nep lo. Team nem zawka lang, Porto leh Benfica an paltlang hnuah City hmachhawn tur hian si thum faia khelmual an tawmpui, AC Milan su tlang leh thei an ni.

Premier League leh FA Cup la tawh, City hian treble champion nih tuma an kalkawngah group stage-ah hneh loh an nei lo va. RB Leipzig hneh zuiin Pep Guardiola enkawl thin, Bayern Munich an paltlang hnuah vawi 14 champion tawh, Real Madrid an hneh zui leh bawk.