Aizawl: Mipui ten man tlawm zawka thlai leh thildang an lei theih nan sawrkarin hmalak a tum.

Chanchinbumi thenkhat ten an kawmna ah Agriculture Minister C.Lalrinsanga chuan he thu hi sawiin Prime Minister Van Dhan Yojana hnuaiah farming society siamin hmalak tum a ni a, Vegetables & Fruit Market Chain dinin thlai tharchhuah te hi TTIFED in an lo lei-chhawng leh dawn niin a sawi a. "Hmun hrang hrang-ah society dinin self help group an awm ang a, an thlai tharchhuah ang ang te chu lakhawmin TRIFED in an lei ang a, man tlawm zawkin mipui ah an hralh leh dawn a ni," a ti. Agriculture Minister chuan thlai dahthatna hmun atan hian Trade & Commerce kudam hlui, Bawngkawn a mi chu hman an tum tih a sawi bawk.

Tunhnaia mi thenkhatin thlai nasa taka an tito chu a dem tih sawiin, "Thlai chingtute hian ni dang aiin an thlai man an tito chuang lo na chungin a zuartu ten a tira an lakna aia a let 3/4 ten an zuar to a, hetianga tih hi a Mizo lo a, kan tihtawp a ngai a ni," a ti a. Thlai chingtu leh a zuartu inkara middleman awm thin chu tihtawp an tum lo tih sawiin rate erawh a to lutuk loh nan control an tum niin a sawi.

Agriculture Minister chuan Van Dhan Mission/PMVDY hi district 8, Aizawl West, Aizawl East, Lunglei, Champhai, Kolasib, Serchhip, Mamit leh Siaha ah te kalpui tum a ni tiin heng bultan nan hian TRIFED atangin nuai 581.55 hmuh tawh anih thu leh district ah te hian pek vek a nih tawh thu a sawi bawk.