Erik ten Hag chuan Ronaldo chu a mimal thil vang chauha training zawm lo a ni thu sawiin an plan-ah a la tel reng thu a sawi a, season thar-ah Maguire chu Manchester United captain a nih chhunzawm tur thu a sawi bawk. 
 
Erik Ten Hag chuan,"Cristiano Ronaldo hi zawrh lai a ni lo tih ka sawi duh a, kan zing ami a ni a, team khelh dan tur ruahmanna pawh a tel vek a ni. A mimal thil vangin Thailand tour-ah hian a rawn tel lo mai chauh a ni. Cristiano Ronaldo telin season thar hi kan hmachhawn dawn tih bak sawi tur a awm rih lo. Cristiano hlimna tur siam ka thiam hran lo va, hma lam thlir chunga amah nena thawh dun ka duh a, a ho a hlawhtlinna hmel hmuh kan duh a ni," a ti. 

Manchester United-in Thailand leh Australia-a pre-season tour an neih laia Ronaldo inlan ve lo hian titi a ti tam hle a, an boss Ten Hag berin Ronaldo chu hralh chhuah an tum loh thu leh a plan-a a tel thu a sawi lawm lawm chung pawhin mi tam tak chuan an awih sak duh chuang lo va, Ronaldo hian Champions League khel phak club luhna tur a hmuh chuan a hnial an ring lo a ni. 

"Amah Ronaldo nen pawh hmachhanah kan sawi dun tawh a, thu pangai leh tha tak kan sawi dun tih ka puang duh a, club chhuahsan lam a ri lo," tiin Ten Hag chuan a sawi bawk.