Zanin dar 9 hian Premier League-ah tun season-a hneh loh la tawng lo leh hmahruaitu Arsenal chu Old Trafford-ah match thum chak zawn a pangana hauh mektu Manchester United hmachhawn turin an leng lut dawn a, team tha pahnih te hian ropui zawk nih an inchuh dawn a ni. 

Manchester United vs Arsenal thlir lawkna

Season bul tan tha Arsenal hi tunah Premier League hmahruaitu niin point 15 an nei tawh a, Erik ten Hag leh a pawl te hian khelh ngaah point 9 neiin 5-na an hauh mek. 

Gunners hian an khelh hnuhnung berah Aston Villa 2-1 in an hneh a, zanin hian Man United hi hneh leh ngei an tum dawn a, thei tak maw.

Mual neitu Manchester United hian bul an tan tha teh chiam lo va, an match hmasa ber leh a dawttuah tlawmin tunah hian table-ah 5-na an hauh mek a, an khel dan enin an insiam rem chho ve hret hret niin a lang. Red Devils hian an match hnuhnung berah team tha Leicester City si khat faiin an hneh a, zanin pawh hian inrintawkna sang tak nen an khel ngeiin a rinawm. 

Man Utd leh Arsenal, Head-to-Head-ah tunge chungnung zawk     

Manchcester United hian Arsenal lakah record tha tak an nei a, tum 237 an inhmachhawn tawhah tum 98 an chak tawh a, Arsenal lam hian tum 86 an hneh ve tawh bawk. 

Man United hian Arsenal nena Premier League-a an inhmachhawn hnuhnung match 8-ah chakna an chang fai vek a, mahse Gunners team hi tun hma ang an ni lo tih chu tun season-a an khelh danah a chiang.        

Arsenal hi Man Utd lakah Premier League away game 15-ah tum khat chiah an chak theih vangin beisei erawh a sang vak lo thung. 

Arsenal hian Premier League away game 17-ah United hi an ngam tawh lo va, an hmachhawn team dang zawng aiin an ngam lo tam tawh zawk bawk a ni.