ZALEN, January 29, 2026: Mana Motors chuan Mahindra Bolero Camper thar an tlangzarh rualin an duhthusam anga siam chhuah a nih thu an sawi a, pahnih an hralh chhuak nghal.

Ninganiah an showroom, Bawngkawnah Camper thar hi an khuh hawng a, Mizorama Mahindra full range dealer Mana Motors neitu, Dr Franklin Lalrinngheta chuan, “Kan lo suangtuah thin anga thain Camper thar an rawn siam chhuak a, air conditioner (AC) leh four-wheel drive a awm kawp tawh a ni,” a ti.

Bolero Camper chhuak hmasaah four-wheel drive awm tho mah se AC a awm tel lo a, AC awmna chu four-wheel a ni lo thung.

Tlangzarhnaah pahnih an hralh bakah hauh lawk mi 30 an awm a, Mizoram dealer atangin Rs 10,51,815; Rs 10,67,445; Rs 10,91,318; Rs 10,98,731 leh Rs 11,04,026-in a lei theih.

Mana Motors dealer principal Dr Marina chuan, “Camper hi Mizorama hriat lar, bungraw phur leh mihring phur thei a ni a. Company dangin nei ve tho mah se Mahindra Camper man a tlawm bik a, chhungkaw lirthei atana hman theih leh thil phur hlawk tak a ni a, a leitute tangkaia an hman theih nan leh tluang taka hmang ngei turin duhsakna ka hlan,” a ti.

Camper tharah hian a hmaa mi an duhkhawp lo lai rawn thuam thain changkang zawkin an duang a; AC four-wheel drive-ah engine M2DiCR, 4 cylinder, 2523 cm hmangin 59.7 kw leh 220 Nm torque a pe chhuak thei a. Fuel litre 57 lengin a hmaah mi pali aia tam a chuan theih.

India-ah sumdawnna atana hman chi lirthei laihawl (light goods vehicle)-ah Mahindra a chungnung a, kum 2025 atanga January, 2026 thlengin hralh chhuah 65.2 a hauh phak.

Mana Motors-in thla liam ta, December, 2025 khan lirthei 217 hralhin thla khat chhunga an hralh chhuah tam ber an hmang zo chiah a. Mi mal hman chi (passenger car) 118 hralhin thla khata an hralh hnem ber a ni a, sumdawnna atana hman chi erawh 99 telin an hralh chhuah dan tlanglawn a ni ve thung a, Camper thar hian an hralh chhuah a tihpun ngei an beisei bawk.