2017-a Europa League an chawi bak kha Red Devils hian trophy an la chawi leh lo va, kum 5 hmalam khan Jose Mourinho-a hovin trophy an chawi a, kha ta player-te kha i la hre reng hlawm em?

Kum 2017, May ni 24 khan Manchester United chuan Europa League final-ah Ajax hmachhawnin sihnih faiin an hneh a nih kha. Khami tuma Red Devils boss Jose Mourinho-a chhuah hnuah Old Trafford-ah trophy a la lut leh lo. Paul Pogba leh Henrikh Mkhitaryan te zara an chak kha kum 5 zet a lo liam ta reng mai. Khami tuma an player te kha i la hre hlawm ngeiin a rinawm a, a thenin football an chalsan tawh laiin thenkhat chu club hrang hrangah an kal darh nasa hlawm hle a ni.   

Sergio Romero - Goalkeeper
Argentine goalkeeper hian 2015 khan Sampdoria atangin Manchester United a zawm a, United-ah season 6 a khel hman, Season liam ta khan Romero hian Italian Serie B club Venezia a zawm a, kumin hian Boca Juniors lamah a insuan leh.

Antonio Valencia - Right-Back
Ecuador international hlui hian 2009 khan Wigan Athletic atangin Manchester United a zawm a, club tan season 10 chhung a khel. Red Devils a chhuahsan hnuah Mexico leh Ecuador lamah te a khel leh a, nikum 2021 khan professional football chawlhsanin a ballboot a khai tawh a ni. 

Chris Smalling - Centre-Back
English defender hian United tan season 10 zet a khel a, 2010 khan Fulham atangin Manchester United a zawm a ni. 2019 khan AS Roma lamah loan-in a kal a, 2020/21 season khan Smalling hian a nghetin Serie A club hi a zawm a ni.

Daley Blind - Centre-Back
Dutch full-back hian Ajax atangin 2014 khan Manchester United a zawm a, club tan season 4 a khel. 2018-ah a club hlui Ajax lamah let lehin tun thlengin a la awm. 

Matteo Darmian - Left-Back
AC Milan atang zir chhuak hian 2015 khan Manchester United a zawm a, kum 5 chhung United tan a khel. 2019 khan Parma lam a pan a, 2020-21 season-ah Darmian hian loan hmangin Inter Milan a zawm, tunah chuan a nghetin an la tawh nghe nghe. 

Juan Mata - Attacking Midfielder
Spanish international midfielder hian 2014 khan Chelsea atangin Manchester United a zawm a, Red Devils tan Premier League match 189 khelin goal 34 a thun. 2021 khan Mata hian kum khat contract a ziah belh a, a contract a zawh hnuah free agent in a awm ta mek a ni.

Ander Herrera - Central Midfield
Spanish midfielder hian 2014 khan Athletic Bilbao atangin Manchester United a zawm a, club tan season 5 chhung a khel. 2019 khan PSG a zawm.

Marouane Fellaini - Central Midfield
Belgian midfielder hian 2013 khan Everton atangin Manchester United a zawm a, season 6 chhung club tan tangkai takin a khel. 2019 khan Chinese Super League a club pakhat Shandong Luneng a zawm.

Paul Pogba - Central Midfield
Manchester United atangin a zir chhuak a, senior team tan a debut match chu 2011 khan a khel. A zir chhuahna club-ah season khat chiah hmangin Juventus a zawm a, season 4 chhung hun a hman hnuah 2016 khan Manchester United a zawm leh a, 2022 alo her chhuah chuan Pogba hian Red Devils chhuahsan lehin a club hlui tho Juventus-ah a kir leh a ni.

Henrikh Mkhitaryan - Attacking Midfielder
2016 khan Borussia Dortmund atangin £26 million zetin Manchester United hian he winger hi an lei chhuak a, kum khat leh a chanve zet United lama a cham chhungin Mkhitaryan hian Premier League match 38 chiah a khel a, 2018 khan Arsenal lama awm turin Alexis Sanchez nen an inthleng a ni. 2020 khan Armenian hian AS Roma a zawm a, kum hnih a cham hnuah 2022/23 hian Inter Milan tana khel turin a chhuak leh.

Marcus Rashford - Forward
Manchester United academy atanga graduate ngat niin senior team tana a hmasa ber turin 2016 khan a khel tan a, 2019 khan kum 4 daih tur United-ah tho hian contract thar a ziak leh.