July 22, 2023; Manipur a Mizo Zirlai awm mekte chu tunhnai a Manipur boruak tha lo chhunzawm zel vangin, Mizoram pan an tum mek nia thudawn a ni a. Hetihlai hian vawiin hian home secretary chuan Manipur a awm zirlai nu leh pa te kawmin, thil awmdan a sawipui nia thudawn a ni.

ZALEN thudawn danin, Manipur buaina chhuah tan tirh May thla chho ah khan Manipur a awm Mizo zirlai 200 dawn te chu Mizoram sawrkar hmalakna in hruai haw an lo ni tawh a, chung zinga engemawzahte loh theih lohna avangin an zirna chhunzawmin Manipur an pan leh tawh a ni.

Manipur a awm zirlai a bikin RIMS a awm te chuan harsatna tawh an nei hran lo a, hetihlai hian tunhnai a boruak sosang thar chho leh vangin engemaw harsatna an tawh palh theih hlauhthawnna an nei a, hemi vang hian vawiin lamah pawh thlawhna hmanga Mizoram rawn pan tum an awm a, naktuk lamah pawh an la awm maithei nia thudawn a ni.

Zirlai nu leh pa thenkhatte hnen atanga ZALEN thudawn danin, vawiin chhun dar 12 khan home secretary H. Lalengmawia chuan zirlai nu leh pa te kawmin, Manipur buaina chungchang kaihhnawih hrang hrangte a sawipui a ni.