Aizawl July 21, 2023 : 20.7.2023 atanga neih tan Parliament Monsoon Session ah Mizoram Rajya Sabha MP K.Vanlalvena chuan vawiin khan Rajya Sabha Chairman Jagdeep Dhankar hnenah Parliament dan hman mek Rule 267 tlawhchhanin Parliament session kal lai titawp a, Manipur buaina leh thil thleng chungchang sawihona hun 24.7.2023 a hawn a phut thu ziakin a thlen.

Vena chuan Manipura chi leh chi inkara buaina avangin mi 140 aia tam an boral tawh a, mi tamtak in hliam an tuar a. Thenawm ram hmun dangah mi sing nga chuang an tlanchhe tawh a, in sang nga chuang hal tawh niin Biak In zathum chuang tih chhiat leh hal a nih thu leh Mizo hnahthlak hmeichhia leh naupangte pawngsual leh nghaisak an ni tih a thu thlenah hian a tarlang.

Manipur thil thleng sawiho phut hian eptu party MP engemawzatin nimin session tan ni atangin Parliament House ah bengchheng an siam a. Thurel mumal awm lovin nikhatna chu tiltiak a ni a. Vawiin a ni hnihna pawh Manipur buaina avang tho hian Parliament rorel a kaltluang thei lo.

Parliament rorel kal tluanglo chungin MP Vena zawhnate Union Minister pahnih DoNER Minister leh Commerce and Industry Minister ten ziakin an chhang a. Mizoram chhim lam kawtchhuah thar tur KMMTTP Road chu July 2025 ah hawn beisei a nih thu leh Kawrpuichhuah Border Trade Centre dinna tur DPR chu Bangladesh lamin a tih ve tur a peih hunah zawh a nih tur thu an sawi a. Sangau - Saisihchhuah kawng laih tura ruahman sa thawk lova cancel tak chu Committee in a ngaihtuah that leh tur thu Vena hi an hrilh bawk a ni.