Manipur tual chhung buaina kal mek zelah Manipur atanga inlak hran duhtute chuan ‘Inrelbawlna hran phutna kawng zawh’ an huaihawt a. Ruah nasa tak sur hnuaiah thawmhnaw duma inbelin mi 10,000 chuang an tel.

Indigenous Tribal Leaders’ Forum (ITLF)-in a huaihawt kawng zawh hi Churachandpur district, Lamka-a neih niin Public Ground atanga bul tanin kilometre thum vel an zawh a, Peace Ground, Tuibong-ah a tawp an khar.

Kawng zawha telte hi a dum vekin an inthuam a. A huaihawttu, ITLF hruaitute chuan kumin chhunga Manipur tlangram district hrang hranga kawng zawh lian ber a nih an rin thu ZALEN an hrilh.

Mipuiin thu ziak (banner) an ken zingah chuan, ‘Tribal thisen a luang tam tawk ta, inlak hran chauh hi a chhanna awm chhun a ni,’ tih te; ‘Inrelbawlna hran phutna kawng zawh’ tih te leh ‘Sorkar laipui, Manipur atanga kan hranna hi min pawmsak rawh’ tih te a tel.

Kawng zawh hi ni sa hnuaiah bul tan mah se Peace Ground an panna kawngah ruah tam tak a sur a, “Ruah sur tam hle mah se mipuite zingah tumah peng buai an awm lo,” tiin ITLF hruaitute chuan an sawi.

Mipuite hi ‘Inrelbawlna hran kan duh,’ tih leh ‘Tribal inpumkhatna awm reng rawh se,’ tia an au bakah Chief Minister N.Biren Singh-a hming lamin, ‘Biren-a sorkar tlu rawh se,’ tih leh Manipur-a Meitei pawl, Arambai Tenggol an duh loh thu an aupui bawk.

A tawp kharna, Peace Ground-ah hian ITLF leh vantlang hruaituten thu an sawi.

Kawng zawh tawpah hian Union Home Minister Amit Shah hnena thleng turin Lamka Deputy Commissioner kaltlangin memorandum an thehlut nghal.

Thla hnih chuang awh tawh Manipur-a Meitei leh Kuki inkara buaina chhuakah hian mi 130 vel an thi tawh a, mi sing telin an himna zawngin an in leh lo an tlansan.

Buaina a chhuah hnuah hian tribal-te hian Manipur atanga inla hranga inrelbawlna hran an phut a ni.