Aizawl May 5, 2023 : Manipur-a chi leh chi inkara buaina chhuak avangin Hmarchhak state an buai hle a, Meghalaya chuan an mi leh sa engemaw zat an lachhuak tawh a, Mizoram, Nagaland, Tripura leh Arunachal te chuan an mi leh sa te biakpawh theihna tur an siam a, Union Home Minister pawhin Karnataka lama election campaign programme a neih a cancel vek. 

Meghalaya sawrkar chuan zirlai tiamin an mi leh sa te la chhuak turin theihtawp an chhuah a, Special flight hmangin zirlai 60 leh Lajong football team member 25 te chu an lachhuak tawh. Zirtawpni khan an mi leh sa 25 te chu thlawhna hmangin hruai haw an ni a, Bus-in zirlai 60 te chu Meghalaya panpui an ni. Meghalaya hian an mi leh sa tangkhang la awm tan helpline 1800-345-3644 an nei bawk a ni. Minister Ampreen M Lyngdoh, Daniel Thangkiew (Political Secretary and OSD to Chief Minister) leh Veveknanda Singh Rathore, SP West Garo Hills te chu an mi leh sa te haw tur buaipui hian Manipur khawpui Imphal-ah an han kal a ni.

Union Home Minister Amit Shah pawhin Karnataka assembly election atana a programme duan sa pawh Manipur buaina avang hian a cancel vek niin sawi a ni a, Shah hian helai buaina hi thlithlai reng a duh niin tarlan a ni. Home Minister Amit Shah chuan Ningani khan Manipur Chief Minister leh a thenawm state-a Chief Minister te chu video-conferencing a lo neih pui tawh bawk.

Manipur buaina sosang mekah Home Department, Government of Mizoram chuan he buaina chungchangah leh Mizoram mi leh sa Manipura tangkhang the hruai chhuah a tumna chungchangah hriat duh nei leh harsatna nei te tan in report a, thu zawhfiah theihna tur helpline a siam a, Landline : 0389- 2334327 / 0389 2335359 ; Mobile : +919862899962 (whatsapp hmanga biakna tur) ; Mobile : +918787784958-ah te biak pawh theih a ni a, SP  (Wireless) hovin MPRO ten chhun zan zawmin helpline hi an vil reng dawn a ni.

Assam Chief Minister Hemanta Biswa Sharma chuan an state chhungah Manipur buaina avanga tlanchhia te chu pawm an nih thu a sawi a, chhungkaw tam tak chuan Assam hi an pan a, heng sahimna zawh te lo buaipui tur hian Cachar District hotute chu a hriattir.

Nagaland, Tripura leh Arunachal Praseh pawhin an mi leh sa leh zirlai te lachhuak turin hma an la ve reng a, Tripura hian helpline number pali an nei a, Arunachal hian an zirlai te rhuaichhuak turin committee an din a, Nagaland hian State Police Control room number, bakah whattapps leh Email bakah State disaster te number an mi leh sa te biak pawh thein an dah bawk.

Indian Railways chuan Northeast Frontier Railways chu Manipur a lut rel May 5 leh 6 a tlan tur te chu a titawp nghal vek a, hei hi Manipur sawrkar thurawn anga tih tawp a ni.

Hetihlai hian Army leh paramilitary te chu Manipur-a buaina thleng vil tur hian tirh luh an ni a, May 3-a tharum thawhna a thlen hnu khan buaina reh theih nan flag march an nei. All Tribal Students Union (ATSU) Manipur ten Meitei te Shedule Tribe-a telh ve an phut avanga kawngzawh an huaihawt chu he buaina chhuah chhan berah ngaih a ni. 

Indian Army te chuan Manipur-a tharum thawhna chu thunun a ni tawh niin an sawi a. IAF chuan Assama-a airfields pahnih atangin C17 Globemasters leh AN32 an tirchhuak tih Indian Army lam chuan an sawi a, hetihlai hian civil mi chhanchhuah kawngah harsatna an tawk tih an sawi a, Churachanpur leh a chhe vel chu a la ralmuang lo hle niin sawi a ni.

West Bengal Chief Minister Mamata Banerjee pawhin Centre chu lo nawr ve bawkin Politics leh election te chu thil pawimawh hmasaber a ni lo a ti a, Prime Minister Narendra Modi leh Home Minister Amit Shah te chu Manipur buaina chingfel hmasa turin a lo ti ve mek bawk.

Manipur Governor Anusuia Uikey chuan mipui te chu remna leh muanna hawi zawnga khawsa turin a lo ngen ve mek bawk a, he buaina hian Northeast a kankai a hlauh thu a sawi a, buaina hian a tihrehawm tak zet tih a sawi ve bawk.