Aizawl May 5, 2023 : Mizoram Chief Minister Zoramthanga chuan Manipur-a buaina avangin he state-a state dang mi awm te leh anmahni ngei pawhin harsatna an tawk tih a sawi a, he harsatna sukiang tur hian Union Home Minister leh Manipur Chief Minister pawh a biak tawh thu a sawi a, Tangkhang te rawn haw theih nan Thlawhna pawh charterd a nih tur thu a sawi.

Zoramthanga chuan, "Manipur State-a buaina awm avangin Manipur-a awmte chauh nilovin, thenawm ram state zawng zawnga awm te, Mizoram atanga awm te, Imphal leh Manipur chhunga chengte zawng zawngin harsatna namen lo kan tawk a. Chumi chu buaipuiin tunah Mizoram Sorkar pawhin, a bik takin Mizoram atanga Manipur-a awm te, an harsatna sutkianna turin theihtawpin hma kan la a. Union Home Minister Amit Shah te, Manipur Chief Minister te nen pawh inbiain, official level-ah pawh nasa takin hma kan la mek a ni," a ti. 

Manipur-a tangkhang te chungchang sawiin, "Vawi tam inbiain hma kan la bawk a. Tin, chutih laia kan tuma chu kan zirlaite leh a bik takin Imphal-a tangkhang laklawhte an lo chhuah thuai theihna turin thlawhna pawh charter-a hire saka Imphal atanga han lakchhuah tumin tunah kan bei mek a ni," a ti. 

Buaina chhuah chhan chu pawi a tih thu sawiin Chief Minister chuan, "He buaina lo chhuah chhan hi pawi kan ti. Dawhkana thil sawi fel theih ni sela dawhkana sawi fel tha kan ti a. Amaherawhchu, chutiang nilova mipui leh mipui inkarah buaina a lo chhuah tak si avangin hemi chinfelna tur hian Manipur Sawrkar leh Central Sawrkar pawh hian chak taka hma an lak kan duh a; hetiang buaina hi a kal zel tha kan ti lo,"a tiin a sawi. 

Ei leh barah harsatna a thlen a hlauh thu sawiin CM Zoramthanga chuan, "He buaina avang hian a bik takin Mizoram lam depa tlang mite leh Churachanpur leh a chhehvela mi ten supply hmuhna tur buhfai emaw, oil lam a ni emaw, thil dang a ni emaw harsatna an tawk palh ang tih kan hlau em em a. Hetiang hi an lo tawk palh a nih phawt chuan kan theihtawpin Mizoram lam atang pawhin lo ngaihtuahpui leh an lakluh theihna tur ngaihtuahpui zel kan tum bawk a ni," a ti.

Tangkhang ten Aizawl an rawn thlen theih ngeina tura hma an lak thu sawiin, "Tangkhang ten Aizawl an lo thlen ngei theihna tur pawhin hma kan la a. He lama an lo thlenna mai nilovin Imphal lama kan Mizo hnahthlak tangkhangte pawh, Churachanpur leh a chhehvel tlang rama him taka an thlen theihna tura hma la turin Manipur Chief Minister pawh nasa takin ka nawr a, ka lo ti ngei ang e, a ti bawk a. Engpawh ni se, heng thil te hi kan tlang mite tan a tha a. Harsatna leh an tan politics-a rahbehna emaw, thil dang emaw thleng lova a kal ngei theihna turin keini pawhin theihtawpa puih zel kan tum a ni tih pawh ka sawi tel duh bawk a ni," a ti.

Chief Minister Zoramthanga, MNF President ni bawk chuan, "Kan tlang mipuite, kan Zo hnahthlak unaute harsatna tawk hi kan theihtawpa harsatna tinreng an tawh hi buaipui a, sutpui a, champion pui zel pawh kan tum a ni. Mizo Hnam thinlung nei, lo champion puitu te hian, kan unaute Manipur-a mi an ni emaw, Burma lama mi an ni emaw, hmun danga mi an ni emaw, keimahni unaute an ni tih hriaa, huaisen taka tanpui zel hi kan tum a ni. 1966 atanga vawiin ni thlengin kan la kal danglam chuang lo. Manipur lama kan unaute buaina pawh, dawhkana thua chinfel hi kan duh ber a, amaherawh chu harsatna an tawh chuan theih ang tawkin kei leh ka Sawrkar hian puih zel kan tum a ni," a ti.