CM hmuh tum lo, Shah chauh duh

Thawhtanni hian Home Minister Shah chuan Manipur hi tlawh a tum a, tribal hruaitute chuan Meitei pa, Chief Minister Singh chu an hmu dawn lo va, Shah ngei hmuh an duh tih an sawi.

Manipur-a tribal pawl hruaitu intel khawmna, Indigenous Tribal Leaders Forum (ITLF) thupuangtu, Lamtingthang Haokip chuan, “Union home minister ngei hi hmuh kan tum a, chief minister a ni emaw, Meitei pawl emaw pawh ni se, anni nena thil sawi erawh kan duh lo,” a ti.

Haokip chuan Shah an hmuh duh chhan hi a hmaa intiamna tihhlawhtlin loh vang a nih thu a sawi bawk a. An buaina tihfelna tha ber chu Manipur tlangrama cheng, a tam ber Kuki-te tana inawpna hran siam a nih thu a sawi baw.

A sawi dan chuan kum 2017, 2019 leh 2022-a intiamna tihhlawhtlin a awm lo va, hei vang hian ro an inrel hranna tur phut chhuah mai chu a tul ta niin a sawi.

Ningani khan party hrang hranga Manipur MLA 13 chuan Guwahati-ah Shah hi an lo hmu tawh a. NPF MLA Awangbow chuan muanna a awm theih nan theihtawpa hmalak a inhuam tih a sawi niin a sawi.

Henglet bialtu BJP MLA Letzamang Haokip erawh chuan Union Minister of State for Home Affairs Nityanand Rai chu Imphal-ah a awm a, tribal hruaitute a hmu duh lo tih a sawi a. “Union minister hian hmuhna hun a la nei lo va, Churachandpur chu a tlawh dawn a. Shah a lo zin thei tur hi a lawmawm a. Eng pawl mahin Singh hi chu an hmu duh lo,” a ti.

Union Home Minister Amit Shah-a’n tun hnaia Manipur-a chi leh chi intihbuaina chhuaka a intibuaite biak a tum thu a sawi hnu lawkah Chief Minister Biren Singh chuan mipuite chu muanna vawng nung turin a ngen thar veleh leh a, hetih lai hian intibuaite hian Singh ni lovin Shah chauh an biak tur thu an sawi ve ve.

Manipur-ah hian boruak dai deuh tawh mah se Nilaini khan buaina a chhuak leh leh a, Imphal leh Churachandpur hmun thenkhatah silai puak ri pawh a awm leh a. Home of Minister of State for External Affairs RK Ranjan Singh-a in luhchilh tumtute pawh venhim hna thawktuten an dang thei hlauh bawk.

Singh chuan Zirtawpni khan thuthar lakhawmtute hnenah mipuite chu muanna vawng nung tura ngen thar lehin, “Manipur hi state ralmuangah kan siam leh thei,” a ti.

Singh chuan army-in beihpui an la thlak reng a, paramilitary force 34,000 chuangin state chhung hmun him lo deuh 38 an la thutchilh tih a sawi bawk.

Army hian Imphal East leh Churachandpur-a silai puakte pawh an titawp thei niin an insawi ve bawk.

“Tute nge an nih hriat lohten silai hmet puakin hmun sang lamah an tlanchhe zui a, tumah thi leh hliam an awm lo,” tiin sipai thupuangtu chuan a sawi.

Manipur-ah hian an state-a cheng zinga 53% lai, Meitei leh tribal inkara chawlhkar thum chuang buaina chhuak tawhah mi 73 thi awm tawhin mi 200 chuangin hliam an tuar a. Chenna in sang chuang hal chhiat niin mi 30,000 dawn awmna mumal nei lovin an awm phah a. Heng mite hi sorkarin an awmna tur a ruahmansaka an awm bakah thenkhat chu state thenawmah an lut bawk.

Buaina hi Metei-ten Scheduled Tribe category neih ve an phutna atanga intan niin tribal-ten an dodal a ni.