Manipur-a chi leh chi inkara buaina chhuak mek zelah Inrinniah ringawt khan pafa telin mi paruk an thi leh a, tun thla chanve liam ta chhunga ni khata thi an tam ber tum a ni.

Inrinnia tuk khawvar hma atanga Bishnupur leh Churachandpur district inrina bawra tharum thawhna irh chhuak lehah hian mi 16-in hliam an tuar bawk.

Army-in beihpui thlak zui ve nghalin hel pakhat, silaia kah hliam an man.

Hmarchhak state-ah hian dan leh thupek kenkawhnaa a hniam leh tak avangin Imphal East leh Imphal West district-ah te pawh curfew thlahdul zeuh zeuh ni tawh mah se Pathianniah hi chuan thlahdul a ni lo tih police-in an sawi.

Inrinni nileng khan Bishnupur-Churachandpur inrina lai bawrah hian lehlam lehlam atangin mortar leh grenade-a inbeihna hriat tur a awm.

Zing khaw var hmain Bishnupur district-a Kwakta thingtlang khuaah pafa telin mi pathum kah hlum an ni a. He mite pathum hi relief camp-a awm reng thin an ni a, Zirtawpni khan May 3-a an khua an chhuahsan vek hnuah an khaw venghim tur hian an let leh a. Venhim hna thawktute chuan an zinga mipa pahnih hi hmanraw hriam tak hmangin an taksa hmun hrang hrangah khen beh an ni a, hnai tak atanga kah hlum niin an sawi.

He thil thlen hnu lawk atang hian a chhan letna thawm a awm nghal a, ralthuam keng mipa rualin Jwakta khaw thenawm pahnih, Churachandpur district-a Phoujang leh Songdo khuate bei nghalin an kap a, mortar leh grenade hmangin an vawm a, hetah hian mi pahnih thiin mi tlem azawngin hliam an tuar.

Terakhongsangbi, Bishnupur district-a inbeihna thlengah mi pakhat thah a ni bawk a, police commando telin mi pathumin hliam an tuar bawk.

Imphal East district-a Sanasabi leh Thamnapokpi khuaah te mi tu tih hriat lohten silai an hmet puak bawk nia sawi a ni a; mahse, thi leh hliam an awm lo.

Mipui pungkhawm thinrimin Langgol, Imphal West district-a in pakhat an hal bawk. 

Imphal-ah chuan inthah thleng duh loh lantirna lian tak huaihawt a ni bawk.

Manipur BJP MLA, Chief Minister N Biren Singh-a makta, Rajkumar Imo Singh chuan Inrinni khan Bishnupur district-a mi pathum thah chungchangah hian sorkar laipui atanga venhim hna thawktute demin an tih tur an ti lo niin a sawi a, paramilitary force-te hi ‘an inthlahdah’ niin a sawi.