Manipur-a chi leh chi inkara buaina a chhuah thla riat chuang hnuah an ruang hlawm loh, Imphal-a ruang dahna ina dah rengte chu Ningani khan dan pangngaia phum turin district hrang hrangah phurh chhuah an ni ta.

Buaina chhuaka thi zinga mi 64-te hi thla eng emaw zat an ruang chu hlawmtu nei lovin ruang dahna inah dah an ni tawh a, Supreme Court thupek angin dan anga phum turin lak an ni ta a ni.

Sorkar laipui leh state sorkar inbiak rawnna angin ruangte hi Ningani zingah khan central force-te venhimna khauh tak hnuaiah phurh chhuah an ni a. Imphal atang hian Air Force chopper hmangin Kangpokpi district panpui an nei a, ruang 19 vel chu thawn chhuah an ni tawh.

Hetiang bawk hian ruang 41 chu buaina chhuah nasat berna hmun, Churachandpur district-ah thawn an ni dawn a. Imphal pawn lama ruang dahna ina dahte pawh hetiang pawh hian district hrang hrangah thawn chhuah an ni ang.

Thla hmasa khan Supreme Court chuan Manipur sorkar hnenah hnenah hian chi leh chi inkara buaina chhuaka thi, tute nge an nih hriat lohte chu an phumna tur bik ruahman turin a ti a. Chief Justice DY Chandrachud-a kaihhruai bench hian sorkar hnenah hian tute nge an nih hriat loh leh ruang hlawm lohte hi ‘tha taka vuia phum turin’ a ti a ni.

Buaina chhuaka mihring dikna chanvo palzut dan zirchiangtu tura tih committee-in rawtna a siam anga thutlukna hi siam a ni a, zangnadawmna leh a tuartute puihna pek dan tur pawh rel nghal a ni.

Report siamah hian ruang 175 zet phum lohvin an la awm a, 169 chu tute nge an nih finfiah an ni a. An zinga 81 chu an chhungten hlawm a, 88 chu hlawmtu nei lo niin paruk chu tute nge an nih hriat loh an ni.

Report-ah hian Manipur sorkar chuan ruang halna tur leh phumna tur hmun kua a rawt a; mahse, khawtlangin thi chhungte hnenah hian pawm lo turin an nawr nia sawi a ni.

May 3 atanga Manipur-a Kuki leh Meitei inkara buaina chhuakah hian mi 180 chuang an thi tawh a ni.