DOWNLOAD OUR APP

Read latest news on your phone
app-store
MANIPUR BUAINA: Larsapin buai denchhena mahni thua hmun hming thlak khap
Oct 08, 2023

Manipur larsap chuan May 3-a an state-a chi leh chi inkara buaina a chhuah denchhena vantlang pawl leh mi mal tu pawh, inbiakpawhna leh map-a mahni thua hmun hming thlak tawh lo turin a ti.

Larsapin tual chhung thuneitute hnena thupek a chhuahah mipuiin hmun hming an thlak leh district leh zirna in hming thlak tumna a awm tih tar a lang a. Hei hi tlangrama cheng, Kuki leh phaia cheng, Meitei inkara buaina awm mek hrin chhuah a nih thu tar lan a ni.

Chief Secretary Vineet Joshi-a’n thupek hming a ziah hnanah hian hetianga dan lova hmun hming thlak chu titawp nghal tur leh a titute lakah pawh na taka hma la turin tih a ni a. ‘Land revenue record-a lang ang lo hming chu dan lo vek a ni’ tia tar lan a ni.

“State sorkarin thu rintlak tak a dawnah vantlang pawl, institution, leh miten hmun hming an thlak a, thlak tumna a awm bawk a, heng hi phal loh a ni a, chi leh chu inkara inhnialna leh inrem lohna thlen thei a ni,” tiin Joshi-a thupekah chuan tar lan a ni.

Manipur-a hmun tam tak chuan Google Map-a hming hnih a nei hlawm nia sawi a ni a. Hmun hming thlak hi dan angin emaw, thil dang ang pawhin tun hma atang tawhin hnam leh hnam inkara inrem lohna thlentu a lo ni fo tawh.

Congress sorkar hun lai khan Thangjing hill pawh Thangting tia thlak niin hei hi a cheng mek, Kuki-ho duh dan a ni a. A tlangdung bul lawka Moirang district-a cheng Meitei-ten an duh lo hle thung.

Kuki-te hian tlangram district, Churachandpur chu ‘Lamka’ tiin an sawi a. Kar hmasa khan Churachandpur-a cheng tam tak chuan social media-ah an bungrua, ‘Lamka’ tia an hmun an ziahna chu state khawpui, Imphal-a post office-ah a tan nasat thu an sawi hlawm.

India Post chuan X-ah insawi fiahin ‘Lamka’ tih hming pu pin code a awm loh thu an sawi ve thung.

“Manipur boruak mek avangin in bungruate tihkhawtlai a ni a. Lamka tih hming pu hian pin code a awm lo va, hetiang a thleng hi pawi kan ti hle a ni,” tiin India Post hian a tar lang a, tunah erawh he an thu tar lan hi an paih (delete) leh tawh thung.

Kuki-te hian Meitei nena an intihbuai hnuah inawpna hran neih an phut a. Indigenous Tribal Leaders Forum (ITLF) chuan Churachandpur-a chengte chu inawpna hran an neih hma chuan ‘Lamka’ tih hmang lo turin an ngen.

Manipur-a tlangram leh phaia hmun tam tak chuan Google Map-ah hming hnih an nei fur a. Kuki-te hian an hmun hmingah hian ‘Veng’ tih an telh thin a, Meitei-te chuan Kuki-ten hmun tam tak chu Wikipedia leh Google Map-ah siam thain a hmingah ‘Veng’ tih an telh thin niin an sawi a. Kuki-te erawh chuan heng hmunte hi tun hma atang tawhin an ta a ni a, nakina inawpna hran an neih hunah dan pangngaiin an la thlak dawn niin an sawi ve thung.

Sorkar chuan Wikipedia leh Google Map-a hmun hming thlak, boruak tang siam thei chu dan bawhchhiatna a nih thu a sawi a. “Cyber crime unit-in a chhui zui mek a. Data lakhawmin finfiahna nen Manipur leh state pawn lama hmun hming thlakna hi chhui chhuah zel a ni ang,” tiin cyber crime unit-a police officer pakhat chuan a sawi.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh