Manipur-a tharum thawhna thleng thar lehah pafa telin mi pathum an thi leh.

Buaina hi Zirtawpni zan tlai tawh taka Bishnupur district-a thleng niin mi pathum hi an mu lai kah hlum an ni a, a tuk zingah Kwakta-ah ngunhnam nena inbeihna a thleng bawk tih Inrinni tuk khan police-in an sawi.

Mi kap hlumtute hi Churachandpur-a mite niin an sawi bawk.

“An pathum hian hun eng emaw chen relief camp-ah an awm tawh a, Zirtawpni khan boruak a that deuh tawh avangin an inah hian an let leh chiah a ni,” tiin police hian an sawi.

Inkahna a thlen hnuah hian Kwakta khuaah hian mipui an pung khawm nghal a, Churachandpur lam pan nghal an tum a; mahse, venhim hna thawktuten an dang tih police chuan an sawi bawk.

“Inrinni tuka nasa taka Kwarka bula inkahna thleng zuiah police pakhat telin mi pathumin hliam an tuar leh a. An pathum hi Raj Medicity, Imphal-ah lak niin an dinhmun a tha,” an ti.

Hetih lai hian district thuneitute chuan Imphal district pahniha curfew an thlahdul hun chhung chu an titawi leh.

“Curfew thlahdul hun chhung hi zing dar 5:00 leh tlai dar 6:00 inkar tih a ni a; mahse, thil thleng avang hian zing dar 5:00 leh chawhma dar 10:30 inkar chauh tih a ni ta,” an ti.

Hetih lai hian Zirtawpni khan Manipur police chuan venhim hna thawktu dangte nen Koutruk hill range-ah beihpui thlakin bunker pasarih an tichhia.

Inrinniah hian assembly bial 27 co-ordinating committee chuan darkar 24 awh bandh an huaihawt a, hei hian Imphal phaiah chuan nunphung pangngai a tibuai hle a. Bazar leh sumdawnna hmun zawng zawng khar a ni.