Aizawl July 12, 2023 : Zo Reunification Organization (ZORO) General Headquarters huaihawtin vawiin khan Directorate Transport Office tual ah Manipur Zo Hnahthlak te thlavang hauhna punkhawm neih a ni. He hunah hian ZORO President chuan India Prime Minister a ngawi reng chu an hrethiam loh thu a sawi a, ZORO General Secretary chuan Manipur buaina chu ring tute leh ring lo mi te inbeihna niin a sawi.

He huna thusawitu ZORO President R. Sangkawia chuan, “Meitei te hian kawng hrang hrangin Zofate hi an phiar ru a, Meitei te hi an sawrkar nen tangkawpin kan unau Zofate hi an bei a ni. Manipur tualchhung buaina hian thla hnih a pel tawh a, heti chunga India Prime Minister a ngawi reng hi kan hrethiam lo hle a ni. India sawrkar hian Zofate hi India ah min ngai lo nge tih hi ZORO zawhna a ni. Chhungkaw pa ber chuan an fate chu a ngaihsak a ni ngai a, Zofate hi India hian min ngaihsak lo niin ka hria a ni.” a ti.

Thusawitu dang L. Ramdinliana Renthlei, General Secretary ZORO chuan, “Meitei ho hian Christian Biakin an bei nasa a, tun buaina hi ring lo mi leh ring tute in beihna a ni. Zofate hi ring tute kan ni a, kan biak Pathian in min pui anga ring lo mite hi hneh in an awm dawn a ni. Mizoram a Meitei ten zalen takin dawr an hawng a, zalen takin Aizawl khawlaiah an la leng a, Mizote hi kan lo fel ta ngawt mai, kan unauten harsatna an tawk zel a nih chuan Mizo thalai te thin a rim tawh a kan awm mai mai dawn lo. Mizoram chhunga Meitei te pawh lo fimkhur turin ka chah duh che u a  ni.” a ti.

L. Ramdinliana Renthlei chuan, “Kan unau Manipur a mi ten an ram chhan in, an hnam chhan in, an khua chhanin zum leh hriam karah an duty a, mahnih ram leh hnam chhan a duty te hi zahna chibai kan buk che u a. In tan kan awm reng a, in hnunga kan ding reng dawn a, atul a nih chuan in hma ah pawh kan la rawn ding dawn a, kan unaute tumah lo zam suh u.” a ti bawk.

Kalkhawmte hian a hnuaia mi ang hian resolution an pass a ni.

1. Manipur tualchhung buaina avanga kan unau ten nunna an chan a, an in leh lo an chan bawk a, chenna leh ei leh in tur tlachham thahnem tak an awm hi na kan ti a, kan tawrhpui takzet a ni. Manipur-in a awp mek Zofate a hnam anga nuai bo an tum mekna atanga damkhawchhuak tura an beihnaah leh Manipur state rorelna laka la hrang tura India Sorkar an ngen mek hi kan thlawp a ni tih hi kan puang e.

2. India Sorkar hian Manipur state a awm Zofate hi rorelna hran pe rawh se.

3. Khawvel hmun hrang hranga awm Zofate kan insuihkawm a, lungrual taka kan awm a, rorelna pakhat hnuaia kan awm theih nan hma kan la zel dawn a ni.