Union Home Minister Amit Shah chuan tun hnaia buaina chhuahna, Manipur-a chengte chu muanna  vawng nung turin a ngen a, hmarchhak state hi a tlawh thuai tur thu leh tharum thawhnaa inhnamhnawih chite chu a be ve ve dawn tih a sawi.

“Court thutlukna a chhuah hnuah Manipur-ah buaina a chhuak a, pawl hnih hi mi tin chungah muanna leh inremna  keng turin ka ngen a. Ni reilo te hnuah Manipur-ah hian kalin ni thum ka châm dawn a, muanna a awm theih nan Manipur mipuite ka kawm dawn a ni,” tiin Guwahati, Assam-a hun a hmannaah a sawi.

Thuneitute chuan Manipur-ah hian chi leh chi inkara buaina chhuak thar lehah mi pakhat kah hlum niin in eng emaw zat hal leh a ni tih Ningani khan an sawi.

Manipur-ah hian thla tir atanga chi leh chi inkara buaina chhuakah mi 70 vel an thi tawh a, mi sang tam tak an chenna in leh lo chân leh tlanchhiatsan an awm.

Chenna in hi 2,000 vel zet hal chhiat nia sawi a ni.

Buaina hi mi cheng tam ber, Meitei-ten Scheduled Tribe status neih tuma an beihna duh lohna lantira Kuki tribal-ten an huaihawt atanga chhuak a ni a. Meitei hian an thil phut hi an hmu a nih chuan sorkar hna leh thil dang dangah an hamthatna dawn ang chu an chhuhsak thei dawn niin an ngai.

Hei bakah hian Kuki-te hian Meitei-te hi tribal an nih ve chuan tuna an tan leh tribal hnam dangte tana ram hauh lai chu an luah ve phalsak an nih an hlau a ni.

Buaina a chhuah hnuah hian sipai tam tak tirh luh niin curfew puan a ni a, hmun thenkhatah chuan chawlhkar eng emaw zat internet pawh tihthih a ni.

Nilaini khan Bishnupur district-a buaina chhuah thar lehna hmunah curfew puan thar leh a ni a. Helai hmunah hian hel pawla mite ni ngeia rinten mi an kap a, pakhatin hliam na tak a tuar a ni.

“Relief camp-a cheng lai pahnih chu hel nia hriatte hian an kap hliam a, pakhat zawk chu damdawi inah a thi zui ta a ni,” tiin police officer-in news agency AFP hnenah a sawi.

Silai an hmeh puah hma hian hel nia hriatte hian buaina chhuak avanga awm khawmte chenna relief camp bula inte chu an hal bawk niin officer hian a sawi.

Minister Govindas Konthoujam-a in pawh a chhungte nen an awm loh hlanin beih leh suasam a ni bawk.

India hmarchhakah hian kum tam tak chhung chi bil leh inlak hran tum pawlten thuneihna sang zawk leh India atanga indan phutin helna hmangin an nawr reng a. Manipur-ah pawh kum 1950 vel atanga helna awm avang hian mi 50,000 vel an thi tawh a ni.

Tun hnai kum eng emaw zat liam ta atang khan hel pawl tam tak chu New Delhi-in inremna siampuiin tharum thawhna pawh a tlahniam sawt hle tawh a ni.