Buaina chhuahna, Manipur an tlawh hnuah India hmarchhaka zirlai pawl thiltithei tak, North East Student Organisation (NESO) chuan Prime Minister Narendra Modi chu remna leh muanna a awm leh theih nan inrawlh thuai turin an ti.

NESO Secretary General Mutsikhoyo Yhobu chuan Zirtawpnia Kohima-a Naga Students’ Federation pisaa thuthar lakhawmtute a kawmnaah prime minister hian Manipur-a buaina awm mek hi a ngai pawimawh lo hle niin a sawi.

Thla thum lai buaina a awm tawh chunga a ngawi tlat reng hian engah mah a ngaih lohzia a tilang niin a sawi.

Zirlai hruaitu hian Manipur-ah hian venhim hna thawktu mi 40,000 chuang awm mah se a tam ber hi tharum thawhna chhuah tanna lai velah awmin hmun kilkhawr lamah an awm lo niin a sawi.

Prime minister hnenah Manipur larsap kaltlangin memorundum an thehluh tih NESO chuan sawiin, “I inrawlh hian intibuai mekte inkarah leh kum tam lo buai tawhnaa thil chhiate pawh mipuite tan a thara din leh theih a ni ang,” tiin an thlen.

Manipur-a muanna a awm leh thuai hi hmarchhak puma khawtlang leh inunauna atan pawh a tha niin an sawi bawk.

NESO hian prime minister hnen bakah hian a hranin governor leh chief minister hnenah lehkha an thehlut a. Manipur-a remna leh muanna a awm theih nana che chhuak thuai turin an ngen.

Tharum thawhna thleng avanga harsatna tawkte hnenah tanpuina an pe a, chief minister leh larsap hnenah hian relief camp-a awm mekte mamawh ngaihtuahsaka ngaihsak turin an ngen bawk.

NESO hian Manipur Chief Minister M Biren Singh leh Governor Anusuiya Uikey te an kawm bakah mipui pawlte an kawm a, heng zingah hian Coordinating Committee on Manipur Integrity (COCOMI) pawh an tel a, ni thum an châm chhungin relief camp hrang hrang an tlawh bawk a. An mi kawmte hnenah hian tharum thawhna titawp turin an ngen hlawm bawk.

Relief camp hrang hranga mite an kawmnaah hian duh inang an nei tlang a, anmahni chenna pangngaia let leh chu an châk theuh va; mahse, boruak a la tan em avangin tun dinhmunah chuan kir leh mai thei an la ni lo niin an sawi.

Tun tum hi NESO-in Manipur-a chet an thawhna hmasa ber a ni a. An secretary general chuan hma an lak zui zel tur thu a sawi nghal a. Intibuai mek hnam hnihte pawh an inbiak theihna turin dawhkan an buatsaihsak theih thu leh inbiakna pawh a awm ngei a beisei thu a sawi bawk.

NESO aiawh hian hmarchhaka zirlai pawl hrang hrang - All Assam Students’ Union (AASU), All Arunachal Pradesh Students’ Union (AAPSU), All Manipur Students’ Union (AMSU), Khasi Students’ Union (KSU), Naga Students’ Federation (NSF) leh Twipra Students’ Federation (TSF) ten Manipur hi an tlawh a ni.