Aizawl May 31, 2023 : Mizoram tlawha rawn zin Union Minister of State for Minority Affairs John Barla chuan vawiin khan BJP Office, Atal Bhawan-ah chanchinthar thehdarhtute a kawm a, he hunah hian kum 9 chhunga BJP sawrkar hmalakna hrang hrang a sawi. Manipur buaina chungchanga Press mite zawhna erawh fimkhur ngai tak a nih avagin sawi theih a neih loh thu in a chhang a, sawrkar chuan remna leh muanna atan thehtawpin hma a lak thu a sawi.

Chanchinthar buaipuite Manipur buai chungchanga Prime Minister a ngawih chungchang an zawhna chu John Barla chuan, "Prime Minister hi chhan nei lovin a ngawi lo ang. A chhan engkim a hria. Tunah pawh Home Minister chuan Manipur a thutchilh a, remna leh muanna a awm theihna turin hma a la mek a ni. He thil thlengah hian fimkhur a ngai a, engkim sawi chi a ni lo," a ti.

Manipur atanga Mizoram-a raltlante chhawmdawlna central sawrkar-in a ngaihtuah sak dawn em tih chungchang zawhna chu John Barla chuan, "Sate sawrkarin an mamawh an dil chuan pek loh a nei lo ang. A tul ang zelin central chuan hma a la ang," tiin a chhang. 

Union Minister chuan BJP-in kum 9 chhunga hmalakna te a sawi hma hian sawrkar hmasa 2004-2014 inkar kum 10 chhung khan India chu hmasawnna kawngah a pil bo a ni. Kha kum 10 chhung khan he ram hian hruaitu chak lo tak a nei a, zep thu a chang lo, sawrkar kha remote-control a thunun a ni, a ti.

John Barla chuan kha kum 10 hlu tak kha chhungkaw pakhatin ho thlawn takin an khawhral a ti a, "He kum 10 chhung khan India chu enconmy chhe tak hnuaiah a awm a, pawisa hlutna nasa takin a tlahniam a, hmasawnna a muang em em a, ramin inrintawkna a neih thin te chu a tlahniam hman hle a ni," a ti.

Minority Affairs minister chuan kum 10 kalta chhunga India ram hmasawnna dinhmun chu khawvela hian a hmu chiang a, a mi cheng te pawhin an hmu a ni. India mi crore 130 chuang te hian Narendra Modi kaihhruaina an ringtawk tih sawiin, "He rinna hi kum 2014 atanga 2023 inkar chhung hian a sang chak hle, remna siam kawngah chak takin a kal a, mi an ngialnghet a, ram chhung hmasawnna chu mitin hmuh a ni," a ti. Minister hian Modi sawrkar hnuaia hmasawnna hrang hrang point 50 chuang zet a sawi bawk a ni.

Mizoramah BJP sawrkar se eng angin nge hma an lak dan tur zawhna chu John Barla chuan, "Mipuite tana hmasawnna siam hi kan tum ber a ni. Tunah pawh kan ti reng. North east pumpuiah tunah pawh hian hmasawnna lam hawiin hma kan la reng a ni," tiin a chhang.