ZALEN September 6, 2023 : Vawiin khan Manipura Zohnahthlakte awmna, tlangram lama Minister leh MLA te bakah, Zofa hnam hrang hrang Pawl aiawh mi 50 rualin Chief Minister Zoramthanga an tawlh a, CM Conference Hall ah inkawmna kan nei a; Manipur Zofate nen inpumkhatna nghet tak nei chunga inkawmna ṭha tak neih theih a ni chu CM hian lawmawm a ti. 

Manipur buaina avanga Manipur mipuite harsatna tawh te, Zofate chunga harsatna leh tawrhna nasa tak thleng hi pawi a ti a. Harsatna leh tawrhna thleng mek belhchhahtu awm tawh lova, Manipur mipui ten nunphung pangngai an neih leh thuai a duhsak tih CM chuan a sawi. Zoramthanga chuan, "Ram hrang hranga cheng Zofate hi hnam hrang hrang niin pawl hming hrang hrang pawh nei mah ila Unau vek kan ni a, kan inunauna hi eng mahin a tihchhiat kan phal tur a ni lova, kan zavaia kan inpumkhatna chauh hi ram leh hnam anga kan dinchuahna tur bulpui a ni," a ti.

CM hian Manipur-a zofate hnenah hian an kal zelna turah Zofa Inpui hrang hrangte leh Pawl hrang hrang ten inpumkhatna ṭha tak neiin, uluk leh fim taka ngaihtuahna seng chunga hma lak a pawimawh thu a lo hrilh a. Mizoram Sawrkar leh Mizoram mipuite chu Unau Zofate tan dinna ngaiah din reng thu leh puih an ngaihna apianga puih zel a inhuam thu a lo hrilh bawk.

Inkawmnaah hian MNF Vice President Vanlalzawma, Ex-MP chuan a telpui a. Manipur lam aṭangin Minister leh MLA te bakah Mizo People’s Convention, Kuki Students' Organisation, Hmar Inpui, Committee on Tribal Unity, Zomi Council Student Organization leh Zohnahthlak hnam Pawl dang aiawhte an tel bawk a ni.