ZALEN March 13, 2025 : Union Home Minister Amit Shah chuan March 15 hian Mizoram a rawn tlawh dawn a, Aizawl atanga Zokhawsang-a Assam Rifles te sawnchhuahna programme a hmanpui dawn niin official te chuan an sawi.

Shah hian March 14 atanga March 16 hian Assam tlawh turin ruahmanna a siam a, March 15 hian Mizoram chu a rawn tlawh thung dawn a, sawmchhuah tur pual hun buatsaih chu a rawn hmang dawn a, hemi ni vek hian Guwahati a pan leh nghal ang.

Mizoram sawrkar leh Assam Rifles te hian October 13, 2024 khan thuphungin inremna an lo siam tawh a, Aizawl khawpui laili taka awm paramilitary force te hi an awmna tura tih Zokhawsang-ah hian sawnchhuah tura tih a ni.

Inremna ni kumin April atang hian hmantan tur an ni a, India rama paramilitary force upa ber te hian an barrack complex, AR ground/Lammual, unit hospital, Loch House, quarter guard leh an hmun thlenkhat leh state chhunga an ram luah te chhuahsanin Zokhawsang hi an pan dawn a ni.

Inremna ang chuan Assam Rifles te hian 23 Sector Headquarter, Mizoram Range, Khatla a mi leh DIG chenna, Raj Bhawan bul, Tuikhuahtlang a mi te chu an luah chhunzawm dawn a ni.

AR ten an chhuahsan tur ram leh building te hi Restriction of Use of Transferred Land Act, 2022 hnuaiah mipui tana hman tura tih a ni.

Aizawl hmun laili atanga AR te chhuahtir tura hmala hmasaber tu chu Mizo National Front (MNF) sawrkar niin khatihlaia Chief Minister Laldenga chuan 1988 khan hma a la a, paramilitray force te leh tualchhungmi te inkara buaina chhuaka mi 11 laiin nunna an chan chu chhuanlamah an hmang.

February 2019 khan Union Home Minister hian paramilitary force te hi an inkhuarna tur Zokhawsang-ah hian May 31, 2019 hma-a insawnchhuak turin a ti a. Amaherawhchu, Assam Rifles hian chhuanlam siamin an awmna hmun tur hian peihfel a la ni lo an ti a ni.

Zokhawsang complex hi April 2023 khan Shah hian a lo hawng tawh a ni.