Aizawl April 27, 2023 : Vawiin khan Ex-MNA-te hmalaknain Hnam sipai, Lance Corporal Laltlankima, V Battalion ruangruh chu an phumna Zawlnuam Vengpui High School Compound atangin Martarte Thlanmual-a phum tura phawrh a ni.

Laltlankima ruangruh thlahna hun hi Zawlnuam Vengpui YMA Hall-ah urhsun taka hman a ni a. He hunah hian Ex-MNA Gen. Hqrs. Treasurer Vanropuia Sailo chuan thu sawiin, "Zawlnuam khawtlangin hnam martar-te  ngaisang tak maia in lo chawimawi hi a ropui kan ti a. Hnam martar-te tana All NGO anga in inpekna kan hmuh hian a hlu kan ti a, in chungah lawmthu kan sawi a ni" a ti. Thlahna hunah hianVC, YMA, MUP, MHIP leh MNF Unit atangin thlahna puan leh pangpar hlan a ni.

Hnam sipai Lance Corporal Laltlankima hi Saitual khua a piang niin kum 21 mi a nihin Zawlnuam-ah hian kum 1968 July 16-ah Assam Riffles in an kap hlum a,  Zawlnuam Vengpui High School, Compound chhungah phum a ni. A ruangruh phawrh leh tak hi Hnam martarte phumna hmun Luangmual-ah phum a ni ang.

Ram tana nun hlan, hnam sipai ruang ruh hi MNF sawrkar tirh atang khan martar thlanmuala zalh tura lak khawm tura ruahman a ni a. Hripuiin avangin he ruahmanna hi chak taka kalpui theih a ni o a. Hrilengin ziaawm a pan deuh tak avangin martarte ruangruh chu lakkhawm hnathawh tan a ni.