Aizawl : Vawiin ni 20.09.2022 hian Martarte Ni Vawi 43-na Mizo Hnam Runah hman a ni a.  MNF Vice President Lalthlengliana chuan he hun hi a kaihruai a, hnam pasaltha martarte sunna hun leh hriatrengna pangpar dahna hun an hmang bawk. He huna thusawitu MNF Sr. Vice President Tawnluia chuan, Martarte hi party ta an ni lo a, Mizo hnam martarte te an ni, a ti 

Tawnluia chuan, "Martarte hi party ta an ni lo a, Mizo hnam martarte te an ni. Martarte thlanmual tur ngaihtuahtu commiittee pawh NGO leh Kohhrante telna a ni a, martarte thlanmual enkawl pawh Art & Culture Dept. kutah a awm tawh. Mizo hnam tana nun hlantute chu hmun hrang hrangah phum ni mah se, a theih chin chinah martar thlanmualah sawn an ni," a ti.

MNF Sr. Vice President chuan MNF-in independence a puan rualin hnam sipaite an chhuak, remna a awm hnuah Mizoram chu special provision neiin - India leh Mizoram leh MNF aiawhin hming sign a ni a. Interim sorkar lo awm tur pawh kha thutlukna awmsa vek a nih thu sawiin, "MNF khan zalenna sual kha an peih tawh lo ni lovin - Kohhran, zirlai leh NGO te ngenna angin tihtawp a ni. Kan hnam sipaiten hlauhna an nei lo. Chawnghei an huam a, tawrh pawh an huam. Amaherawhchu, ram mipuite tlin tawk zelin kan kal zawk a ni," a ti.

MNF Undergroud sawrkara Army Chief, Tawnluia chuan, "Kan martarte hi Mizo hnam dinchhuahna tura nun hlantute an ni a. Mizo hnam hi tu ma tihbuai loh leh mahnia ro inrel a nih theih nan nun hlan an ni. Kan hnam meichher chhitute leh Mizo nationalism kengtute an ni a. Kan hnam martarte hi harsatna tinreng paltlanga nunna hial hlantute an ni a, kan chawimawi tur a ni a, anamhni zahna chibai kan buk tur a ni," a ti bawk.

"MNF hi Mizo hnam party kan ni a, party dang dang nen khaikhin theih kan ni lo," tiin, Tawna chuan, "Ram leh hnam zalenna atan Pathian leh kan ram tan tiin kan Mizo hnahthlak inpumkhatna tura hmalatu leh nationalism kengtu kan ni. Kan martarte hi nationalism meichher chi engtu an ni. Mizo hnam hian hnam zalenna kan neih theih nan hma lam panin kan kal zel dawn," tiin, kalkhawmte chu hnam tana ke pen zel turin a sawm bawk a ni.