ZALEN September 20, 2023 : Vawiin khan Mizo Hnam Run-ah Martar Day hman a ni a, thusawitu MNF President & Chief Minister Zoramthanga chuan Mizo hnam damchhuahna awm chhun chu nationalism a ni, a ti a, martarte thisen hlutna chu a rei tulh tulh anga a hlut zia hriat a nih tulh tulh dawn niin a sawi.

Zoramthanga chuan, “Israel-te pawh nationalism banga inhung tur an nih laiin an inhung phui zo lova hnam sawm an ral. Kum 2000 an vahvaih hnuah Juda leh Benjamin hnam tlem (Isarel)-te an dingchhuak a. Kum 1948 khan an nationalism-in a dinchhuahtir chauh a ni. Pathianin keini hnam tlem te pawh ram min pe a. Khawchhak atanga lo tla thlain ram, hnam leh lal thuthlung nen kan nationalism chu kum 1966-ah a lo tho ta a. Kum 20 chhung hnam thinlung thisena baptis-in a awm a. A tawpah kum 1986-ah inremna kan lo nei ta a ni," a ti.

“He hnam thinlung (nationalism) hi a rei tulh tulh a, hnam tlem zawk tan chuan a hlu tulh tulh a ni. Dam chhuahna awm chhun a ni. Kan chhehvel en ila nationalism tel lo chuan hnam engzat nge buai tawh? Kan hnam martarte thisen hlutna hi a rei tulh tulh anga kan hre tulh tulh dawn a ni,” a ti bawk.

Zoramthanga chuan B34 Gulmohar Park-ah remna palai tura Laldenga leh Tawnluia te nen an kal thu sawiin, Morarji Desaia sorkarin an phatsan avangin tan in-a an tantir an nih thu a sawi. “MNF hotuten India nen remna an siam tiin dawta min hek avangin ramhnuai hqrs. lam chuan Pu Denga chu president leh primary member a nihna an paihsak hial. Tin, India sorkar chuan Pu Denga chu foreign-a Ambassador ni turin an thlem a, kei pawh IAS confer tur leh Pu Tawna Sipai-ah an thlem. Amaherawhchu kan dinna kan sawn chhin lo, tlanchhuah dan chiah kan ngaihtuah,” a ti.

MNF chu tuar tura din nia sawiin, “He ram (Zoram) hi martarte thisena baptis a ni a. Kan hnam hi a ral tep thin, mahsela tling lo takin hnam thuthlung ‘Pathian leh kan ram tan’ tih kengtuten harasatna karah an vuan tlat zel a, a rawn tho chhuak leh thin. MNF chu tuar tura din, harsatna su tura din a ni. Chutiangin ram an enkawl chuan a puitling thin,” a ti.

“MNF hi a san lai leh chhiat em em lai a awm. Mahse martarte thisenin a suk fai puan sintute kan ni a, mawina leh malsawmna kengtute kan ni a. Kawng dang hawi thei kan ni lo. Harsatna leh lungngaihna karah tap chungin kan kal zel ang, a tawpah Pathianin malsawmna min pe ngei ang,” a ti bawk.