Aizawl June 9, 2023 : Vawiin khan ZPM chuan an party office-ah Political Session an nei a, he hun ah hian K. Laltluangkima, PAC member chuan thusawina hun a hmang a, 2018 inthlan dawna Zoramthanga'n Mau, Cheng Nuai thum sem leh Chakai Farm a au pui chu a bawhzuina a chiri ta rih niin a sawi.

Kalphung thar - mipui sawrkar tih thupuia hmanga thusawitu K. Laltluangkima chuan, “Khawvel ram hrang hrang hruaitute hian inthlan dawnah hian thupui bik an nei thin a, US President Barack Obama khan ‘Change’ tih kha a hlawhtlinpui a, Health Care System tha tak a siam a. Donald Trump a lo lang ve leh a, ‘Make America Great Again’ tih chu rawn au pui lehin US Economy chawikan kha thupui berah a rawn nei leh bawk a. Kan ram lo hruai tawhtu te pawh hian au hla bik an nei thin a, Pu Thenphunga khan Human Right rawn au puiin a hlawhtlinpui a, Pu Lal Thanhawla chuan Remna leh Muanna a rawn tlangau pui ve leh a, a hlawhtlinpui leh viau bawk. Kum 2018 a lo thlen chuan Pu Zoramthanga chuan Mau, Cheng Nuai thum sem leh Chakai Farm a rawn au pui leh a, inthlannaah hnehna chang mah se, a bawhzuina lam erawh a chiri ta deuh a ni,” a ti. 

Tluanga chuan, “ZPM chuan kan Leader Pu Duha hovin Kalphung thar- mipui sawrkar tih kan au pui mek a, kan au pui mek hi politics game satliah mai ni lovin; hnam din khawchhuahna tak tak mipui nawlpui tana hmasawnna thlen thei tur thil a ni. Tunah hian Mizo zingah mau chanchin sawi peih mi pakhat chiah kan nei a, mi dang chuan kan sawipui peih lo niin a lang a, Chakai Farm hmanga intodelh tum hmel pawh kan hmu rih lo bawk a ni," a ti.

Khawvel ram hrang hrang thlirin mi pakhatin hun rei tak ram a hruaina ram hmasawn tak sawi tur a van thu sawiin, "Vanduaithlak takin chung zingah chuan keini ram pawh hi kan tel ve hlauh mai. Kum 35 dawn mai mi pahnih rorelna hnuaiah kan awm tawh a, hmasawnna tam tak nei mah ila mi state dang hmasawnna nena khaikhin chuan rualawh a na em em reng mai a ni. Kum 30 lai mai Singapore President nihna chelh Lee Kwan Yew ‘Singapore Founding Father’ an tih ang hiala fuh hi lo ni ve hlauh se kan vannei tur hi a ni a. Amaherawhchu tuna kan dinhmun kan en hian lung reng a awi ne maw tih mai awl tak a ni. Hausak thut chakna avangin kan thalai ten ni tin a sur a sa hnuaia hna thawh an mausam tan mek a, dan lova sumdawnna te chuan kan ram titi a luah mek reng a ni. Kan State-in pakhatna kan hauhna kawng hrang hrang hi han thlir ila a chhuanawm loh hlawm hle a, kalphung thar mipui sawrkarah chuan heng zawng zawng hi kan tih reh a tul a ni,” a ti bawk.