Aizawl: ZPM Working President K. Sapdanga chuan, "Ram tana mawhphurhna la ngam roreltu nih kan tum a ni," a ti.

Khawchhak tlangdung a fanna ah he thu hi sawiin ZPM Working President K.Sapdanga chuan , "Kan ram tuihalna tireh theitu chu political party te ni loin, mipuite hi kan ni a. Kan mamawh kan neih beiseiin political party pahnih kan lo thlan tlin chhawk ngat ngat tawh a, kan mamawh min pe thei kan la ko chhuak fuh thei lo niin alang. State dangte aiin kawng tinrengah kan hnufual fal a, BPL kan la pung zel a, zirna kawngah kan hnufual telh telh a, hriselna kawngah kan hnungtawlh a, kan thalaite tan hna thawh tur avang em em a, ram leiba kum tin a pung zel a, kan tu leh fate tan phurrit kan hnutchhiah tam tial tial a, Zoram mipuite hian ram chhanchhuak turin hmanruaah ZPM te hi min hmang turin mipuite kan sawm a ni," a ti.  

Sapdanga chuan, "ZPM chuan he hnam chhuan lo la awm zel tur tana pawi khawih ve loh hram kan tum. Ram tana mawhphurhna la ngam roreltu nih kan tum a, ram roreltute hi kum nga chhung atana thlan an ni a, inthlan leh huna tlin duh luat vanga dikna kenkawh ngam loh te, tih tur pawimawh tih ngam loh te, tih loh tawp tur tih luih tlat chinte hi he ram hian a chhiatphah rei ta hle a ni," a ti bawk.