Aizawl: Mizoram Board of School Education (MBSE) buatsaih “Mizo Tawng Ruaipui” programme chu Zir-tawp zan khan International Webinar hmangin neih a ni a, L.Thangmawia, Vice Chairman, Human Resources Development Board chu khuallian niin Mizoram chhung mai bakah USA leh Australia ram atangin thupui hrang hrang sawi a ni.

Khuallian L. Thangmawia MLA chuan programme hlu tak MBSE-in a buatsaih chu lawmawm a tih thu sawiin MBSE in Mizo tawng hmasawn nana a hnathawhte ropui a tih thu a sawi a. Tawng hian Culture leh History te nen inlaichinna thuk tak a neih avangin Mizoram University lam pawhin uluk zawka research a kalpui a tul thu a sawi a. Kan tawng leh culture te Lusei centric a kalpui a tam thu sawiin tawng bungrua tih hausak nan Lusei tawnga awm lo, zofa hnam peng dang tawnga awmte zotawnga sengluh thiam a that a rin thu a sawi a, Sikul leh College-a Mizo customary law zir tel a tul a tih thu a sawi bawk.

Mizo language Board (MLB) din tura Mizoram sawrkar hmalakna tar langin ni 13.8.2019 a Chief Minister Pu Zoramthanga'n HRD Board meeting a neihpui naah MLB din tura hmala turin HRD Board chu mawhphurhna a pek thu sawiin  hmalak chhunzawm dante a tar lang a. Kumthar budget session ah MLB Bill hi putluh hman beisei anih thu a sawi bawk.
MBSE Chairman JH Zoremthanga chuan MBSE in Mizo Language Committee te din a, Mizo tawng chung-changa hma lak anih tawh dante a sawi bawk.

He hun hi Dr Zoramdinthara, Asso. Professor, MZU in kaihruaiin Prof. R. L. Thanmawia, Rozama Chawngthu, H.Ronghaka leh Lalnunhluna ten thupui thlanbik an sawi a. Mizoram oawn USA atangin Lalchhanhima Mizo leh Australia atangin Joseph L.Bawitlung ten an awmna rama Mizo tawng dinhmun an sawi bawk.

He programme hi a duh tan MBSE official youtube channel ah en theih tura dah a ni.