Aizawl : Mizoram khawpui laili a sumdawnna hmun pawimawh Millennium Centre chuan a huang zauh tumin hma a la mek a, he buiding beh chhan hian mipui mamawh tak nia lang Multi level parking leh Multipurpose centre sak belh tum a ni a, hetiang rawtna hi awm mahse sorkar lam chuan rawtna awm hi an la pawmpui chiah lo nia thudawn a ni.

Millennium Centre chungah hian khawpui mamawh tak Parking chhawng siam tum niin, chawng khatna hi 800.13 Square metre niin a chung hi 838.71 Square metre a zau tur a ni thung a, hemi chungah hian Basketball court, mi 482 thut theihna/ awmna tur chu sak tumin Mizoram PWD chuan project an nei a, Architecture design pawh March 2019 khan peih fel a ni tawh. Parking chawng hnihah hian Light Motor Vehicles (LMV) 46 bakah ke hnih nei (Two wheeler) 92 leng tura ruahmanna hi siam a ni. He hmun sak nan hian nuai 541 an ruahman.

He sumdawnna hmun behchhan tho hian Multipurpose Centre sak tum niin Zalen chuan thu a dawng a, mahse, Mizoram PWD lamin Annual Report 2019-2019 an tihchhuah Chapter 8, Achievement under Chief Architech tih thupui hnuaia a lan dan atanga chuan Millennium Centre Roof Top (Health Club & Fitness) tiin project hi siam a ni thung. Millennium thuneitu lam chuan Health Club leh Fitness lam hi chu a leng a nih chuan dah a nih tur thu an sawi chauh thung. He hmun hi tuna building ding lai chunga sak tur niin square meter 600-a zau a awh dawn a, cheng nuai 68 senna tura ruahman a ni. Architecture design hi November 2018-a peih fel tawh a ni.

Millennium Centre Authority hian he hmun behchhan hian sawrkar hmasa lamah khan Hotel sak an lo tum tawh thin a, mahse, he an rawtna hi an pawmsak ta lo a ni.