Aizawl: Mizoram KVI Board Chairman Lalthanliana chuan Zirtawpni khan cheng nuai 60 senga sak ‘Multi Disciplinary Training Centre (MDTC) Administrative Building, Zemabawk ah a hawng.

Lalthanliana chuan Mizoram KVI Board hnuaia MDTC ten Administrative Building tha tak an sa zo thei chu lawmawm a tih thu sawiin Mizoram sawrkar chungah lawmthu a sawi a, MDTC Administrative Building hmuh chu industry lama tui mite tana hmun tangkai leh chhawrnaawm tak ni turin leh mi tam tak tan ngelnghet leh rintlak eizawnna an kalpui theih nan malsawmna thlentu ni turin duhsakna a hlan a ni.

MDTC Administrative Building hi January ni 17, 2019 a sak tan a ni a, 397.54 Sqm a zau niin ni 197 chhung a sak zawh a ni. A sak hna hi Department in an thawk a ni. MDTC hnuaiah hian thalai kut themthiam, khawpui leh thingtlang atangin an training thin a, kum 1992 atanga a hawn ni thleng hian thalai mi 10000 chuang ten training passed chhuak tawhin eizawnna ngelnghet an nei tawh a ni.