ZALEN, 4th June: Hlimen Branch YMA chuan Melthum nen ramri chungchanga an intihbuaina-ah Melthum Library an tihchhiat avangin Zoram mipui lakah thupha an chawi thu thuchhuah an siam a. Thil thlen dan an sawifiah bawk. 

An thuchhuahin a tarlan danin Melthum tleirawl ṭhenkhatin Hlimen lam Welcome Signboard an tih chhiat avang leh Hlimen Veng tlangval pakhat an sual rawn avanga buaina chhuakah khan Hlimen lam innghahkhawmna hmun Melthum Library thlanga awmte chu, Melthum lam hian anmahni Library bang (tile) chu tichhiain, chumi aṭang chuan lungin an rawn vawm vak mai a, mi ṭhenkhat an vawm hliam nghe nghe.

Chumi avanga Hlimen Ṭhalai lam thinrim chuan han nanchin ngei tumin an um chho nghal a, an lo tlanchhiat hman avangin an han nang hman ta lo a ni. Chutia thinrim taka an rawn chhuk leh lam chuan Melthum Library lo inhawng huau chu hmu-in an thinrim hrikthlak nan an hmang ta niin an thuchhuah ZALEN in a dawnah tarlan a ni a.

"He thil thleng hi Hlimen Branch YMA chuan pawi a ti tak zet zet a. Library tihchhiat pawi zia hre lo tam tak kan ṭhalaiteah an lo awm bawk nen. Chuvangin, Zoram mipuite he thil thleng avang hian min ngaidam a, min hrethiam hram turin kan ngen tak meuh meuh a che u." tiin Branch Secretary chuan a ziak bawk a ni.