Paris Saint-Germain (PSG) star Lionel Messi chuan October ni 17-a sem tur 2022 Ballon d'Or chu Real Madrid striker Karim Benzema'n a dawn ngei a rin thu a sawi chhuak.

Kum 34 mi Messi hian nikum khan he chawimawina hi a vawi 7-na turin a dawng a, kuminah erawh a khelh dan enin a beisei sang vak lo a ni mai thei. Kumin hian football-a mimal chawimawina sang ber Ballon d'Or dawng thei tur hming langsar pathum an awm a, chungte chu Real Madrid striker Karim Benzema leh Liverpool player pahnih Mohamed Salah leh Sadio Mane te an ni. An ni pathum hian May ni 28 khan UEFA Champions League final khelin Benzama telna team Real Madrid an champion a nih kha. 

Messi chuan TyC Sports hnenah,"Tun season chu Benzema hi a chetha em a, Champions League an champion bawk nen a chungah mipui mit a fu thup a ni ber mai. UCL last 16 atang phei kha chuan Real tan hero dik tak a ni a, UCL bikah goal 15 thunin top scorer a nih bakah a team a champion pui bawk avangin ani aia dawng tur chuang an awm lo," a ti. 

Sawi zawmin,"Round of 16-ah PSG nen an khelh tumin hat-trick a siam a, quarter-final-ah Chelsea hmachhawnin hat-trick a siam leh bawk. La Liga lamah goal 27 thunin goal thun tam ber a ni a, Madrid chu league title a chawi pui bawk. Competition hrang hrangah game 46 khelin Benzama hian goal 44 zet a thun thei a, heng a record neih te en hian kumin Ballon d'Or trophy chu a phu hlein ka hria," tiin Messi hian Benzama chu Ballon d'Or dawng ngei tura a rin thu a sawi.

Nakum hian Lionel Messi tan Ballon d'Or a beiseiawm thei a ngem?

Chhan hrang hrang vangin tun season hi Lionel Messia hian a hmang ropui lem lo hle a, Champions League round of 16, second-leg-a Karim Benzama'n hat-trick a siam tum pawh khan PSG lamah khan a khel ve nghe nghe. Hetih lai hian Messi hian season thar a nghakhlel tawh hle thung a, theih tawp chhuah a, a tha thei ang bera mual chhunga kir leh a tum thu TyC sports a hrilh. 

Season tharah Paris Saint-Germain tan tha zawka a khelh theih ngei a inbeisei a, amah pawhin, "Nikum kha chu a harsa em a ni," a ti thlawt. 2022 FIFA World Cup hi Messi-a'n Argentina tan a major international tournament khel hnuhnung ber tur a nih tawh hmel bawk.

Robert Lewandowski: Bayern Munich-ah ka hun a tawp tawh

Lewandowski chuan,"Bayern lama ka cham hun tur chu a tawp tain ka hria. He club tana khelh zel nachhan tur pawh hi ka neiin ka hre tawh lo. Bayern hi club serious an ni lo. Chuvangin he club-ah hian khelh chhunzawm zel duhna ka nei tawh lo a ni. Club chhuahsan mai hi a chinfel dan tha ber chu a niin ka hria. Min dan loh hram ka beisei," a ti.

Lewandowski hian Bayern Munich lamah kum khat daih contract a la nei chungin chhuahsan a duhthu chiang takin a sawi lang. A thusawi dan atang hian lungawi lohna lian tak a nei tih a hriat theih bawk. Tunah hian Barcelona nen sawi zawm mek a ni a, hetih lai hian Liverpool chhuahsan tumtu Sadio Mane chu Lewandowski thlaktu turin Bayern lam hian an beisei ve mek niin sawi a awm bawk.