Aizawl August 17, 2024 : Vawiin khan Mizoram Gorkha Youth Association (Central) chuan Gorkha School Complex, Khatla-ah an pawl dinna ni pualin Thisen Pek Runpui Blood Donation Camp an buatsaih a, Gorkha thalai mi 87( mipa 80 leh hmeichhia 7) ten thisen an pe.

MGYA hian kumtin August thlaa Blood Donation Camp hi an buatsaih thin a. An buatsaih chhan hi Mizoram tan engemaw an pawl din hriatreng nan an tih ve duh vang niin MGYA (C) hruaitu pakhat chuan a sawi. Hun hmasa lamah te pawh Association of Voluntary Blood Donors of Mizoram atangin pawl anga an hmalakna avangin chawimawina an lo dawng tawh a ni.

Thisen hi Blood Bank, ZMC a thawktute a hmun kalin an la a, blood bag hi an lo ken tlem deuh avangin thalai engemaw zatin thisen hi an pe thei lo a ni. Thisen petu thalai te hi Aizawl a veng hrang hranga MGYA Branch member te an ni.

MGYA (C) hnuaia hian Mizoram pumah Sub Headquarters 1 leh Branch 17 an awm mek a, chung zinga 12 chu Aizawl khawpui chhungin niin a bak 5 te chu Aizawl pawn a ni. Member hi mi 5000 vel an awm mek a ni.