May 17, 2024;'Ride to clean air’ tih thupuia hmanga thirsakawr hmanga India ram fang mektu, Vanlallawmzuala Varte (LZa) s/o VL Chhuanawma, Mission Veng chu vawiin thlengin km. 8906 a in khalh tawh a, Aizawl atangin Gujarat a thleng tawh.

LZa hian January 25, 2024 khan Aizawl a chhuahsan a, nimin thleng khan km. 8906 a tlan tawh a, km. 8,000 dang bawr vel tlan tur a la nei.

Lza Varte hian Gujarat a thleng tawh a, vawiin bikah Limkheda a pan mek. Naktuk ah Madhya Pradesh a lut ang a, tluang taka a tlan theih chuan kumin Agust thla ah India ram fan chhuah theih a in beisei tih ZALEN a hrilh.

Chawhrualin LZa Varte hi nitin km 100.39 tlan ziah ang a ni a, ni 21.2.2024 khan km 158.49 a tlan a, hei hi ni khat a a tlan thui ber a la ni.

January ah km 527.98 a tlan a, February ah km 2,609.56, March ah km 2,625.97 leh April ah km 2,266.73 a tlan.

Nikum May thla khan Lailapur, Assam atangin Mizoram chhim tawp, Khaikhy thleng ke ngatin a lo kal chhuak tawh bawk a, km 623 hi ni 18 leh darkar 13 chhungin a thleng hman a ni. Ke a a kalna ah khan faina chungchang tlangaupuiin, bottle 7,000 chuang a chhar a, chung bottle te chu khaw tin bawlhhlawh paih na hmunah a paih a ni.