ZALEN Aug. 11, 2025 : Nimin Pathianni inkhawm lai, chawhma dar 10 leh 11:15 inkar vel khan Lalhlunpuia in, Champhai Venglai a mi chu mi tu tih hriat lohte’n kawngkhar karchhiain an rawk a, steel almirah chhunga dah pawisa fai Rs. 2,50,000 an lak bakah mobile phone Redmi Note 12 an la tel bawk.

Lalhlunpuia hian Champhai Police Station-ah FIR a thehlut a, Champhai Police te hian an thu dawn bawhzuiin Bulfekzawl Tiau lui bulah Lalnunmawia (35), Aizawl Bawngkawn nia insawi leh Tuangsianthanga, Letpanchhawng, Myanmar, tuna Ramhlun Venglai, Aizawl a khawsa mek nia inchhalte chu an man a ni.

August ni 3, ni 5 leh ni 8, 2025 khan Champhai Bethel Middle School chu tu tih hriat loh te'n an rawk bawk a, Bethel Middle School zirtirtute chuan Champhai Police Station-ah FIR a thehlut a, Champhai Police te chhuizuina atangin Champhai Venglaia In rawktute zinga mi Tuangsianthanga hi a ni tih hriat chhuah a ni a, a rawkpui mi pakhat an la zawng mek a ni.

In rawktu mi pahnih - Lalnunmawia leh Tuansiangthanga te kut atang hian pawisa fai Rs. 2,15,000 hmuh let a ni.

#ZalenNews