ZALEN March 28, 2025; Mamit District Jail a tang lai (Convict) mipa pahnih chu nimin (27.3.25) khan Mamit District Jail atangin an tlan chhuak a, pakhat zawk chu tukin dar 1:30 vel khan man leh a ni.

Mamit Times tarlan danin, Mamit district jail a tang lai mi pahnih - Alex R. Vanlalhruaia (30) S/o R. Tlanglawma Chhinga veng Aizawl, In rawk vanga kum 2023 a man, kum hnih leh tha hnih chhung tang tura convict leh Malsawmlawmpuia (25) S/o Hmingthansanga, Bazarveng Mamit, rukruk avanga kum 2024 a man, thla ruk chhung tang tura convict te chu nimin tlai dar 3 vel khan an tlan chhuak a, prison department thawktute leh Mamit police ten zawn hna ngawrh taka an thawh mek laiin tukin dar 1:30 vel khan Malsawmlawmpuia zawk hi Mamit khaw chhungah man leh a ni a, police custody ah dah nghal niin vawiinah court-ah hruai a ni ang.

Heng mi pahnih, Mamit district jail atanga tlan chhuakte hian jail complex chhunga bike pakhat Phoenix (TVS) registration no. MZ 08-3070 (rawng sen) chu an ru chhuak bawk a, nizana man tak Malsawmlawmpuia thu zawhfiahna atangin an bike rukchhuah an dahna hi hriat a ni a, Mamit Venghlun thlanmual thlang, field kawnga an dah chu nizan vek khan lak nghal a ni.

Malsawmlawmpuia hi man a nih hma hian thian dang neiin, Mamit PWD vengah mi In an rawk leh hman tih hriat a ni.

Hetihlai hian jail atanga tlan chhuak zinga pakhat zawk Alex R. Vanlalhruaia chu he thu buatsaih lai thleng hian man leh a la ni lo a, zawn hna hi ngawrh taka thawh mek a ni