ZALEN July 28, 2023: East Tuipui Constituency huam chhung  Farkawn leh Samthang khua te a tlawh naah ZPM Leader Lalduhoma chuan, Sawrkar atanga hamthatna dawn tur a awm a, party mi leh sa induhsakna hmanga inpek an duh ve dawn loh thu a sawi a, mahni party mi an nih loh avanga mi rethei ensan an ni thin chu tihtawp an tum tih a sawi bawk.

Duha chuan, “Leiba kan ngah hle mai a, Pathian leh mipui zara sawrkarna kan lo chang a nih chuan kan in renchem a ngai hle dawn a ni. A hautak lo thei ang bera kan inrelbawl a ngai a ni. Lok Ayukta kan thuam chak dawn a, hnathawk theiin kan siam dawn a ni. Chumi chuan rang takin eirukna a tih reh pawh kan beisei a ni. Sawrkar atanga hamthatna dawn tur a awmin a phu leh mamawh tak tak ten an hmu mai dawn a. Party mi leh sa induhsakna hmanga inpek kan duh ve lo. Mahni party mi an nih loh avanga mi rethei pawh nise ensan an ni thin hi tihtawp kan duh a ni. Economic nationalism kan ngai pawimawh a, kan rama khuanu dah sa awm ang ang te kan ngai pawimawh dawn a ni," a ti bawk. 

Samthang leh Farkawn atanga mi thar an lawmlut te chunga an lawm tih sawiin Lalduhoma chuan, “ZPM party in hmasawnna kan hmuh te hi kan thawhrim vang a ni vek bik lova, Pathian malsawmna kan dâwn liau liau a ni. Heng kan mi thar duhawm tak takte hi ruling atanga lo kalte, hun rei tak ruling lo ni tawh te bakah politics a la zuang lut ngai miah lo te an ni hlawm a; chutih laia a parzu tlan tur la awm ve miah lo ZPM party ah ram siam that duh avanga an lo lut hi thinlung takin kan lawm tak meuh meuh a ni,” a ti. 

ZPM leader chuan, “Tunah hian kan party chuan official candidate kan puang fel ta a, kan ramin kan tawrh nasat em em eirukna leh hlemhletna laka kan fihlim theih nan nasa takin kan infuih thin a. An fihlim ngei pawh kan ring bawk a ni. ZPM te chu danglam ngam turin kan inchah thin a, kalphung thar hmanga mipui sawrkar siam tum kan nih avangin dikna leh huaisenna nen ram rawng kan bawl tur a ni. ZPM chuan party dang te tih dan ang ni lovin collective leadership kan kalpui a, Chief Minister leh party President nih kawp a rem ve lo a ni. Chief minister in works department a chang ve dawn lo va, department dang zawng zawng a vil dawn a, a chak lo a dawmkang ang a, enpui ngai a enpui zel dawn a ni,” a ti.