ZALEN, Mar. 14, 2024: Theology leh secular lam academician leh research scholar 31-te zir chianna thuziak dah khawmna lehkhabu, Lênbuang (Mizo Christian Literature Zir Zauna) chu Ningani khan tlangzarh a ni.

Lehkhabu hi Mizo Department, Mizoram Christian College (MCC) buatsaih niin June 27, 2023-a ‘International Seminar on Mizo Christian Literature’ an huaihawt tuma mi thiamte thuziak chhiar chhuah (paper present) dah khawmna a ni.

Lenbuang hi J.M.Llyod Hall-ah Rev. VL Luaia Hranleh, Senior Executive Secretary, Mizoram Synod-in a tlangzarh a, MCC-in lehkhabu rotling, Mizo hnam leh literature tana hlu tak tur an tichhuak thei chu hlawhtlinna ropui a tlin thu a sawi. 

PC Lalngaihzuala, Head of Department, Mizo Department, MCC kaihhruai inkhawmah hian Dr. H. Laldinmawia, Assistant Professor, Pachhunga University College-in lehkhabu sawi hawngin MCC-in seminar buatsaiha lehkhabua an chhuah thei chu Mizo literature huanga a hlutzia sawiin zir chianna atangin kawng hrang hranga sakhuana leh literature chai tur a tamzia a lan chian thu a sawi.

MCC Principal Dr. Tawnenga pawhin thu sawiin Mizo Department, MCC-in thawh hona tha tak nena zir chianna lehkhabu an tichhuak thei chu lawmawm a tih thu a sawi a. Zirna leh Mizo hnam tana tih tur tam tak la awmah MCC-in hma a lak zel tur thu a sawi bawk.