ZALEN August 15, 2025 : Mizorama lakhuihthei thar tam ber Sialhawk khua-a lakhuihthei chingtute chuan tun lai hian lakhuihthei an seng mek a, August ni 13, 2025 (Thawhleh) atangin Chhingchhip-a MIFCO hmunah lakhuihthei hi nitin pik-up trip 2 zel turin an hralh mek a ni.

Lakhuihthei hi a thar tirh lamah khan Guwahati-a North East Aeromatic Company hnenah a rah hring ₹10/kg -in pek a ni a. Vawi khat an rawn kal a, kawng chhia-in a tihbuai tak avangin hralh chhunzawm theih a ni ta lo. 

Lakhuihthei hralhna chungchangah harsatna an tawh avangin Sialhawk Pineapple Growers Society chuan MIFCO Chairman Pu Lalṭhazuala Royte hnenah an harsatna te thlenin, Chhingchhipa MIFCO hmuna sawngbawl turin Sialhawk lakhuihthei leisak turin an ngen a. MIFCO Chairman-in hma a laksakna zarah hian August ni 13, 2025 (Thawhleh) aṭang hian nitin pik-up trip 2 zel MIFCO ah hian an chhung lut ta a ni.

Sialhawk khua hian nikum 2024 ah khan lakhuihthei quintal 9000 an hralh chhuak a, Kumin 2025 ah hian Lakhuihthei hi quintal 12000 vel thar chhuah an beisei a ni.

Mizoram chhungah Aizawl leh khawpui dangah te Sialhawk lakhuihthei hi an hralh ṭhin a ni a. August ni 13, 2025 thleng hian quintal 5000 vel an hralh tawh a ni.

Sialhawkah hian lakhuihthei chingtu chhungkaw 250 vel an awm a. Mizoram pum lakhuihthei thar chhuah aṭanga 64% hi Sialhawk khaw thar chhuah a ni.