ZALEN January 28, 2026 : MIFCO Chairman Lalthazuala Rawite chuan vawiin khan Sialhawk khuaa Lakhuihthei chingtute kawmin an harsatna tawh leh hmalakpui dan turte a sawipui a, sawrkarin Lakhuihthei te leihsak an tum bakah a chinna hmun te a tlawh nghal bawk.

Lalthazuala Rawite chuan, "Sialhawk khua leh a chheh vela Lakhuihthei chingtuten harsatna an tawh thin, a hralhna kawngah sawrkarin kumin hian nasa zawkin kan buaipui dawn a, Chief Minister Pu Lalduhoma pawhin min tuipui a, Lakhuihthei an thar te Mizoram Food & Allied Industries Corporation Ltd.(MIFCO) chuan leisak vek tumin ruahmanna kan siam a. Chutihlaiin MIFCO hnuaia thawktu kan tlem em avang leh harsatna dang avangin kan theih anga tam la turin kan inbuatsaih ta zawk a ni. Lakhuihthei hi Kg.1 cheng 18 atanga 20 vela lei turin kan in ruahman a, Sialhawk leh a chhehvela Lakhuihthei chingtute harsatna sut kian kan tum a ni," a ti.

MIFCO Chairman chuan, "Kum 2024-a MIFCO Chairman hna ka zawm tirh khan leiba kan ngah hle a, theih tawp chhuaha hma kan lak hnuah kum 2025 October kan thlen chuan kan leiba kan rul zova, hlawkna (profit) Rs.14 lakh kan nei hman a, tunah hian theih tawp chhuahin hma kan la zui zel a ni. MIFCO hian Lakhuihthei bakah Sapthei leh mipui ei tur sa thianghlim chenin kan buaipui mek a, chini leh buhfai thlengin kan buaipui tawh a ni. Mizote hian ram pawna hralhchhuah tham tak tak thlai hi kan thar meuh lova, chutihlaia Sialhawk mipuiten innghah nan leh eizawn nan Lakhuihthei an hmang mek hi a ropui a, sawrkar tibuai tham law law leh buaipui tak tak tham khawp tharchhuak zel turin duhsakna ka hlan a ni," a ti.

Sialhawk Pineapple Grower Society Chairman J. Rampanmawia chuan, "Kum 2025-ah Sialhawkin Lakhuihthei 12,000 qtl. kan thar a, kan chhut danin Mizoram puma Lakhuihthei tharchhuah 64% zet Sialhawk khuain kan thar a, kan thar tam ber tum kum 2022-ah khan 14,000 qtl. kan thar a ni. Kumin hian 12,000 qtl vel thar leh kan inbeisei. Kan Lakhuihthei tharchhuahte hi a hmunah Rs.10/kg in sumdawngten an rawn lei thin a, Aizawl Bazar, Champhai leh hmun dangahte kan hralhchhuak ber. State pawn leh India ram pawn thleng pawhin min rawn dawr ve fo thin naa a kalkawng a thuiin a senso a tam a, kan hlawkpui lo a ni."

"Sawrkar kal tawhten a hralhna kawngah hma min lakpui ve tawh bawk mahse system fel tak hnuaia thiltih a nih loh avangin harsatna kan tawk reng a, chuti chung chuan kan innghahna ber chu MIFCO a ni reng a ni. Kan thar tam zual lai chuan chawhrualin nitin Pik-up trip 20 kan thawnchhuah a ngai thin a ni. Chuvangin kuminah pawh hian kan thar chhuahte hralh kawngah sawrkar kan beisei sang hle a, kan tharchhuah ang angte min leisak thei vek a nih chuan kan lawm tak zet ang," a ti.