ZALEN September 10, 2023 : Mihring (passenger) phur lirthei chi hrang hrang - taxi, maxi cab, bus leh rental car-ah te an awmna chin hriat theihna, Vehicle Location Tracking System (VLTS) vuah vek tur a ni a. Mizoramah pawh he project thar hi tun kar Zirtawpni (September 15, 2023) hian hawn tum a ni.

ZALEN-in Transport department thawktute hnen atanga thu a dawn danin VLTS khawl (device) hi lirthei khalhtu (driver) leh a mi phurh (passenger)-te inkarah dah/vuah a ni ang a. Passenger-ten eng emaw buaina leh harsatna an tawh chuan chu khawl a hmehna awm (button) chu an hmet ang a, chu signal chu command and control centre leh emergency response support system team (police) te nen thlunzawm a ni a, helaia duty te hian an lo chhinchhiah ang a. Lirthei awmna, a tlanna lam, a tlan chak zawng, motor registration number leh a neitu kha a hriat theih dawn a ni.

VLTS hi mihring phur chi lirthei ah vuah vek tur tih a ni chungin two wheeler taxi leh auto rickshaw te erawh a huam dawn lo a ni.

Transport department thawktute chuan VLTS hi passenger phur chi lirtheite chuan an lei tirh atangin an vuah ngei ngei a ngai dawn a, hemi tel lo chuan lirthei an ziak lut (register) thei dawn lo a. Motor hluiah pawh January 1, 2019 hnu lama taxi leh passenger phur lirtheite chuan an vuah ngei ngei a ngai tih sawiin VLTS hman atanga thla 12 chhunga an vuah lo a nih chuan fitness certificate pek theih an ni tawh dawn lo a, an permit pawh replace phal a ni dawn lo niin an sawi.

VLTS khawl hi Rs. 12,000 man a ni a, hei hi lirthei neituten an lei a ngai dawn a ni.

VLTS hi Nirbhaya case tia hriat lar, kum 2012-a Delhi-a bus chhunga pawngsualna rapthlak tak thleng vanga sawrkar laipuiin lirthei a chuang, a bikin hmeichhiate himna atana hmalakna a ni a. Ministry of Women & Child Development pawmpuina hnuaiah Nibhaya framework vuahin project hi kalpui a ni.

Ministry of Road Transport & Highway chuan October 25, 2018 khan hriattirna chhuahin state tinte chu January 1, 2019 atangin passenger phur lirtheiah VLTS leh emergency button vuah vek turin a ti.

Mizoram bikah VLTS project kalpui nan hian vaibelchhe 10.4 ngai tura chhut a ni a, a senso 90% hi central in a tum ang a, 10% chu state tum ve tur a ni.

VLTS atan hian Directorate of Transport building ah command and control centre dah a ni a, hemi hnuaiah hian thawktu mi 15 dah an ni.

VLTS hi India ram state hrang hrang ten an hmang nual tawh a, hmarchhak state bikah Mizoram chu hmang hmasa pawl a ni dawn a ni.