May 17, 2024: Vawiin khan Chief Minister Lalduhoma chuan a office-ah Millennium Centre Authority thawktute meeting a neihpui a. Millennium Centre enkawl dan leh sak chhunzawm chungchangte a sawipui.

Chief Minister hian, Millenium Centre-a vantlang inthiarna man chawi lova kalpui theih a nih leh nih loh te, dawr neitute leh a luah chhawngtute inkarah luah man mumal zawk leh inremna dan tha zawk a duan theih em? tih te chu Governing Body in lo ngaihtuah se tha a tih thu a lo hrilh a. Tha taka Millenium Centre inenkawlna a kal zel chu lawmawm a tih thu a sawi.

He hunah hian R. Lalnunpuia, Manager, Millenium Centre Authority chuan Millenium Centre sak a nih dan kimchang leh tuna an dinhmun sawifiahna a nei hmasaa. Chief Secretary kaihhruai Millenium Centre Governing Body-in North Block Building chung lama sak belh tura ruahmanna a lo duan tawh te pawh a sawifiah a ni.

Millenium Centre hi Structural Safety Certificate nei, a original design anga chhawng li la sak belh theiha him a ni a. Tun dinhmunah chhawng khat, Food Court tur bik sak belh dan ngaihtuah phawt ni se, tiin Governing Body hian ruahmanna a nei a. An ruahmanna hi Chief Minister hnenah hian an thlen a ni.

A sakna sum hi a tir atangin Bank Loan hman a ni a, sawrkar sum ruahman a ni lo. Loan hi an rul zo vek tawh a ni. Tuna sak zawm lehna tur pawh hi sawrkar sum hmang lova kalpui leh tur a ni ang.

Tunah hian Millenium Centreah hian dawr 342 a awm mek a, an zinga 4 hi hunbi neia luahtir (rent out) niin a dang te chu a leitute hnenah kum 91 chhung atan pek (leased) an ni. Thawktu nghet 8 an awm mek a, rukruk ching lak inven nan High Definition CCTV 66 zet an vuah bawk.