ZALEN March 5, 2025 : State Transport Authority (STA) chuan passenger phur thei tura phalna a pek Passenger Tax chawi thin te bak hire tawh lo turin hriattirna a tichhuak a, mimal motor lo in hire tir thin te chu hrem an nih tur thu an sawi.

State Transport Authority chuan Mizoram-ah chuan Two Wheeler Taxi, Auto Rickshaw, Four Wheeler Taxi, Maxi Cab, Bus leh Rental Car te hian Passenger Tax an pe an ti a. Heng lirthei ho te chauh hi man chawia hman theih an ni, an ti bawk.

STA chuan mimal, company/firm leh sawrkar Department thenkhat te'n mimal motor (Private regd. Vehicle) an hmang thin tih an hriat thu an sawi a. Hemi chungchang hi December 13, 2024-a State Transport Authority Meeting chuan a ngaihtuah a. Mimal motor hire hi MV Act leh Rule kalh anih avangin an ngai pawimawh a. Tun hnuah chuan mimal motor hmang lova, phalna nei ngei Passenger Service Vehicle chauh lo hmang tawh turin an ti a ni.

Mimal motor neitu thenkhat, lo in hire tir thin an awm anih chuan ti tawh lo turin an hriattir a. Hriat chhuah an nih chuan dan anga hremna lekkawh tur a ni.